प्रशांत जगताप आणि मोहसिन शेख यांच्या नेतृत्वाखाली कोंढव्यात काँग्रेसची ‘लाट’; पदयात्रेने विरोधकांचे धाबे दणाणले!
पुणे महानगरपालिका निवडणुकीचे बिगुल वाजल्यानंतर कोंढवा परिसरात राजकीय समीकरणे वेगाने बदलू लागली आहेत. काँग्रेसचे स्टार प्रचारक प्रशांत दादा जगताप आणि मोहसिन शेख यांच्या नेतृत्वाखाली आज कोंढव्यात निघालेल्या महा-पदयात्रेने सर्वांचे लक्ष वेधून घेतले. या पदयात्रेला मिळालेला जनसागर पाहता कोंढव्यात काँग्रेसची मोठी लाट असल्याचे स्पष्ट होत असून, या शक्तिप्रदर्शनाने विरोधकांचे चांगलेच धाबे दणाणले आहेत.
साईबाबा नगरमध्ये जनसागराचा उठाव
प्रभाग क्रमांक १९ मधील काँग्रेसच्या अधिकृत उमेदवार तसलीम हसन शेख, आसिया मणियार, काशिफ सय्यद आणि तेहजीब सिद्दिकी यांच्या प्रचारासाठी आज साईबाबा नगर परिसरात पदयात्रेचे आयोजन करण्यात आले होते. या पदयात्रेत हजारो कार्यकर्ते आणि स्थानिक नागरिक स्वयंस्फूर्तीने सहभागी झाले होते. विशेषतः युवा वर्गाचा उत्साह ओसंडून वाहत होता. हातामध्ये काँग्रेसचा तिरंगा आणि उमेदवारांचे कट-आउट्स घेतलेल्या कार्यकर्त्यांनी संपूर्ण परिसर काँग्रेसमय करून टाकला होता.
जुन्या नगरसेवकांविरुद्ध संताप; बदलाचे वारे
गेल्या काही वर्षांत कोंढव्याचा विकास पूर्णपणे रखडला असल्याची भावना यावेळी नागरिकांनी व्यक्त केली. “जुन्या नगरसेवकांनी निवडून आल्यानंतर प्रभागाकडे पाठ फिरवली, मूलभूत सुविधांसाठी आम्हाला संघर्ष करावा लागत आहे,” अशा शब्दांत स्थानिकांनी आपला संताप व्यक्त केला. प्रलंबित कामे आणि तुटलेला जनसंपर्क यामुळे नागरिक सध्याच्या नेतृत्वावर नाराज असून, काँग्रेसच्या सुशिक्षित आणि कार्यक्षम उमेदवारांकडे ‘विकासाचा नवा पर्याय’ म्हणून पाहत आहेत.
प्रशांत जगताप आणि मोहसिन शेख यांचा झंझावात
यावेळी बोलताना प्रशांत दादा जगताप म्हणाले की, “कोंढव्यातील जनतेने नेहमीच प्रेमाची साथ दिली आहे, पण दुर्दैवाने येथील जनतेला विकासापासून वंचित ठेवण्यात आले. यंदा आम्ही ही परिस्थिती बदलण्यासाठी मैदानात उतरलो आहोत.” मोहसिन शेख यांनीही महापालिकेतील सत्ताधाऱ्यांच्या अपयशावर कडाडून टीका केली. या नेत्यांच्या आक्रमक पवित्र्यामुळे काँग्रेस कार्यकर्त्यांमध्ये नवा उत्साह संचारला असून, प्रचारात काँग्रेसने आता निर्णायक आघाडी घेतली आहे.
यंदा काँग्रेसचाच ‘हात’ भारी!
पदयात्रेदरम्यान ठिकठिकाणी महिलांनी उमेदवारांचे औक्षण केले, तर तरुणांनी घोषणाबाजीने परिसर दणाणून सोडला. कोंढव्यातील ही गर्दी केवळ औपचारिकता नसून तो सत्तापरिवर्तनाचा संकेत असल्याचे राजकीय विश्लेषकांचे म्हणणे आहे. रखडलेल्या कामांचा हिशोब मतदार मतपेटीतून नक्कीच पूर्ण करतील, असे चित्र सध्या दिसत आहे.
