कोंढव्याचा ग्राऊंड रिपोर्ट: मिठानगरचे ‘कडू सत्य’ आले बाहेर ; विद्यमान नगरसेवकांविरोधात मतदारांचा एल्गार!
पुणे महानगरपालिकेच्या निवडणुकीचा ज्वर चढू लागला असून, प्रभाग क्रमांक १९ (कोंढवा खुर्द – कौसर बाग) मध्ये राजकीय समीकरणे वेगाने बदलताना दिसत आहेत. येत्या १५ जानेवारीला होणाऱ्या मतदानापूर्वी मिठानगर परिसरातील नागरिकांनी स्थानिक लोकप्रतिनिधींच्या कामाचा पाढाच वाचला असून, सत्ताधाऱ्यांविरुद्ध प्रचंड रोष व्यक्त केला जात आहे.
बिल्डर-नगरसेवक साटेलोटे..? भ्रष्टाचाराचे गंभीर आरोप मिठानगर परिसरात गेल्या काही वर्षांत अनधिकृत बांधकामांचे पेव फुटले आहे. ‘गुंठेवारी’च्या नावाखाली नियमांना हरताळ फासला जात असून, चार मजल्यांच्या इमारती थेट आठ मजल्यांपर्यंत कशा पोहोचतात? असा सवाल नागरिक करत आहेत. “प्रत्येक वाढीव मजल्यासाठी नगरसेवकांना मोठा ‘मलिदा’ द्यावा लागतो,” असा खळबळजनक आरोप नाव न सांगण्याच्या अटीवर काही स्थानिक रहिवाशांनी केला आहे. विकासाच्या नावाने केवळ स्वतःची माया गोळा करणाऱ्या या लोकप्रतिनिधींनी सामान्य जनतेला वाऱ्यावर सोडल्याची भावना येथे प्रबळ आहे.
पाणी आणि विजेचा ‘वनवास’ कायम मुस्लिम बहुल वस्ती असलेल्या मिठानगरमध्ये मूलभूत सुविधांची अवस्था दयनीय आहे:
पाणी टंचाई: दिवसातून केवळ दोन तास पाणी येत असल्याने महिला वर्गात प्रचंड संताप आहे. पाण्यासाठी आजही नगरसेवकांकडे विनवण्या कराव्या लागतात, हे दुर्दैव असल्याचे नागरिक सांगतात.
वीज समस्या: वारंवार खंडित होणारा वीजपुरवठा ही या भागाची मोठी समस्या बनली आहे. डिजिटल इंडियाच्या गप्पा मारणाऱ्या सत्ताधाऱ्यांनी मिठानगरला मात्र अंधारात ठेवल्याची टीका होत आहे.
वाहतूक आणि कचरा: अरुंद रस्ते आणि नियोजनाचा अभाव यामुळे वाहतूक कोंडीचा विळखा कायम आहे. ड्रेनेज तुंबणे आणि कचरा उठाव न होणे या प्रश्नांकडे विद्यमान नगरसेवकांनी पूर्णपणे दुर्लक्ष केल्याचा आरोप होत आहे.
परिवर्तनाचा निर्धार : काँग्रेसला मिळणार संधी? सत्ताधाऱ्यांच्या ‘सत्तेच्या माजाला’ कंटाळलेल्या मतदारांनी आता बदलाचा पवित्रा घेतला आहे. यावेळच्या निवडणुकीत काँग्रेसच्या नव्या आणि तरुण चेहऱ्यांना कोंढवा आणि मिठानगर परिसरात मोठी पसंती मिळताना दिसत आहे. “आम्ही फक्त मतं देण्यासाठी नाही, तर जाब विचारण्यासाठी सज्ज आहोत,” असे म्हणत १५ जानेवारीला या नगरसेवकांना त्यांची जागा दाखवू, असा पवित्रा नागरिकांनी घेतला आहे.
मिठानगर मधील हे ‘कडू सत्य’ सत्ताधाऱ्यांची झोप उडवणारे ठरणार का..? आणि १५ जानेवारीला जनता खरोखरच परिवर्तनाची मोहोर उमटवणार का? हे पाहणे आता महत्त्वाचे ठरेल.
