आता नुसती चूल पेटणार नाही, तर काळाबाजार करणाऱ्यांचे धाबे दणाणणार!

पुणे जिल्हाधिकाऱ्यांचा ‘डिजिटल’ इंगा; गॅसच्या रांगेत खोडा घालणाऱ्यांची आता खैर नाही!

पुणे |  पुणेकर हो, गॅस सिलिंडरसाठी एजन्सीच्या दारात हेलपाटे मारण्याचे आणि वितरकाच्या ‘जी-हजुरी’ करण्याचे दिवस आता इतिहासजमा झाले आहेत! पुण्याचे जिल्हाधिकारी जितेंद्र डुडी यांनी गॅसचा काळाबाजार करणाऱ्यांच्या नरड्यालाच नख लावले असून, जिल्ह्यात आता ‘OTP’ (वन टाईम पासवर्ड) शिवाय सिलिंडरची एक टाळीही हलणार नाही, असा फतवाच काढला आहे.

९६ तासांचा ‘अल्टिमेटम’ आणि प्रशासनाचा चाबूक!

जिल्हाधिकाऱ्यांनी केवळ नियम लादले नाहीत, तर वितरकांना काळाची मर्यादाही घालून दिली आहे. गॅस बुक केला की ९६ तासांच्या (४ दिवस) आत तो तुमच्या घराच्या उंबरठ्यात आलाच पाहिजे! जर वितरकाने यात टाळाटाळ केली किंवा ‘गॅस संपलाय’ अशी मखलाशी केली, तर त्या एजन्सीचे मरण ओढवलेच म्हणून समजा. सामान्य जनतेच्या चुलीवर ज्याला राजकारण करायचे असेल, त्याला जिल्हाधिकाऱ्यांनी थेट घरचा रस्ता दाखवण्याची तयारी केली आहे.

अडथळा आणणाऱ्यांना ‘खाकी’चा प्रसाद!

या प्रक्रियेत कोणी ‘भाई-दादा’ किंवा मध्यस्थ आडवे येत असतील, तर त्यांच्या मुसक्या आवळण्याचे स्पष्ट आदेश पोलीस प्रशासनाला देण्यात आले आहेत.

“नियमानुसार सुरू असलेल्या वितरणात कोणीही खोडा घातला, तर त्याच्यावर कडक फौजदारी कारवाई करा,” असा सज्जड दमच जिल्हाधिकाऱ्यांनी भरला आहे. म्हणजेच, आता फक्त गॅसचा शेगडीच नाही, तर नियम मोडणाऱ्यांची पाठही पोलिसांनी शेकली पाहिजे, असाच हा पवित्रा आहे.

काय आहेत नवीन नियमावलीचे ‘झटके’?

• OTP शिवाय गॅस नाही: जोपर्यंत तुमच्या मोबाईलवर आलेला पासवर्ड वितरकाला मिळत नाही, तोपर्यंत व्यवहार पूर्ण होणार नाही.

• वजन काट्याचा हिशोब: सिलिंडर देताना त्याचे वजन करून दाखवणे आता अनिवार्य आहे; चोऱ्यामाऱ्या करणाऱ्यांचे हात आता दगडाखाली सापडले आहेत.

• दराची पारदर्शकता: शासनाने ठरवून दिलेल्या दरापेक्षा एक पै जास्त मागितला तरी गय केली जाणार नाही.

पुणेकरांना कळकळीचे आवाहन: आपला मोबाईल नंबर गॅस कंपनीकडे नोंदवून ठेवा. जोपर्यंत सिलिंडर डोळ्यासमोर येत नाही आणि वजन काट्यावर चढत नाही, तोपर्यंत आपला ‘OTP’ कोणालाही देऊ नका. हा तुमचा हक्क आहे आणि तो हिसकावून घेणाऱ्यांची आता खैर नाही !