पुण्यावर आभाळ फाटलं; वरूणराजाचा ‘दणका’ अन् पुणेकरांची ‘दाणादाण’!
पुणे : काल दुपारी पुण्याच्या अंगाची लाहीलाही होत असताना नियतीचा खेळ असा काही फिरला की विचारता सोय नाही! रणरणत्या उन्हाचे चटके सोसणाऱ्या पुणेकरांच्या डोक्यावर अचानक काळ्याकुट्ट ढगांनी असं काही वेढं घातलं, की जणू आभाळच खाली उतरलं. आणि मग काय? क्षणात वादळी वाऱ्याचा सुसाट तांडव आणि त्यापाठोपाठ गारांचा जो तुफान वर्षाव सुरू झाला, त्याने बाणेरपासून कोथरूडपर्यंत आणि पाषाणपासून हिंजवडीपर्यंत अक्षरशः ‘थैमान’ घातलं!
पावसाचा राडा अन् झाडांची पडझड!
अहो, पाऊस तरी कसला? हा तर अस्मानी सुलतानीचा इंगा! बाणेर-बालेवाडीत गारांचा खच पडला, तर पेठांमध्ये पुणेकरांची चांगलीच धांदल उडाली. प्रभात रोडपासून ताडीवाला रोडपर्यंत तब्बल १४ ठिकाणी बिचाऱ्या वृक्षराजांनी लोटांगण घातलं. कुठं गाडीवर झाड कोसळलं, तर कुठं घराच्या छतावर फांद्यांनी ‘आसन’ ठोकलं. रस्त्यांवर पाणी साचून असा काही निसरडा ‘ऑईल’चा खेळ झाला की, आमचे दुचाकीस्वार भाऊ ठिकठिकाणी घसरून पडत होते. सुदैवानं काळ आला होता पण वेळ आली नव्हती; कुणालाही गंभीर इजा झाली नाही, हेच त्या गणपती बाप्पाचे उपकार!
पुणे वेधशाळेचा ‘दम’ आणि पावसाचा ‘इशारा’!
आता सावधान! हे तर फक्त ‘ट्रेलर’ होतं, पिक्चर अजून बाकी आहे. पुणे वेधशाळेने कपाळावर आठ्या घालून सांगितलंय की, ३१ मार्च आणि १ एप्रिल रोजी पुण्याचा पारा आणखी घसरणार आहे. नुसता पाऊस नाही, तर मेघगर्जना आणि विजेच्या कडकडाटासह ‘ऑरेंज अलर्ट’चा इशारा दिलाय. म्हणजे पुढचे दोन-तीन दिवस घाटापासून ते शहरापर्यंत पावसाचा हा ‘नाच’ सुरूच राहणार.
सोमवारचा पावसाळी ‘धावता’ स्कोअरबोर्ड:
कुठं किती पाऊस पडला? तर पाषाणने मारली बाजी (४६ मिमी), लोहगाव ३८, तर आमच्या शिवाजीनगरने २६.२ मिमीवर बॅटिंग केली. कोरेगाव पार्कपासून ते तळेगावपर्यंत पावसाने आपली हजेरी लावून उन्हाचा ताठा पुरता उतरवला आहे.
थोडक्यात सांगायचं तर, पुणेकरांनो… छत्र्या बाहेर काढा आणि झाडाखाली उभं राहण्याचं धाडस करू नका; कारण वरुणराजा सध्या पूर्ण ‘फॉर्म’मध्ये आहे!
