बेडकिहाळच्या प्रलंबित विकासकामांसाठी खासदार प्रियांका जारकीहोळी यांना निवेदन
निपाणी: बेडकिहाळ (ता. निपाणी) येथील विविध प्रलंबित विकासकामांच्या पूर्ततेसाठी बेडकिहाळ ग्रामपंचायतीच्या वतीने शनिवारी निपाणी येथे खासदार प्रियांका जारकीहोळी यांची भेट घेऊन त्यांना सविस्तर मागणीचे निवेदन देण्यात आले. खासदारांनी या मागण्यांकडे सकारात्मक लक्ष देऊन प्रश्न मार्गी लावण्याचे आश्वासन दिले आहे.
प्रमुख मागण्या आणि विकासकामे:
ग्रामपंचायतीने दिलेल्या निवेदनात गावातील रस्ते, पाणी आणि सौंदर्यीकरणाच्या मुद्द्यांवर भर देण्यात आला आहे. त्यातील प्रमुख मागण्या खालीलप्रमाणे आहेत:
रस्ते डांबरीकरण : सिद्धेश्वर मंदिर ते पेठ लाईन रस्ता, सिद्धार्थ नगर ते चिकोडी मार्ग, आणि सिद्धार्थ नगर ते डॉ. बाबासाहेब आंबेडकर चौकापर्यंतच्या रस्त्यांचे तातडीने डांबरीकरण करणे.
अंतर्गत रस्ते : गावातील सुमारे १५ कि.मी. अंतर्गत रस्त्यांचे डांबरीकरण आणि ५ कि.मी. सिमेंट काँक्रीट (CC) रस्ते तयार करणे. तसेच जुन्या बसस्थानकापासून बाजारपेठ मार्गे वाल्मिकी नगरपर्यंतचा रस्ता दुरुस्त करणे.
विद्यार्थ्यांची सुरक्षितता : गावापासून शांतीनगर सर्कलपर्यंत शालेय विद्यार्थ्यांच्या सुरक्षेसाठी रस्त्याच्या दोन्ही बाजूंनी फुटपाथ बांधावेत.
पाणी पुरवठा: बेडकिहाळ-शमनेवाडी यांची सध्या असलेली संयुक्त पाणी पुरवठा योजना स्वतंत्र करून गावाला हक्काचे पाणी उपलब्ध करून देणे.
गावाचे सौंदर्यीकरण : दसरा चौक येथील पारंपरिक तळ्याचा आधुनिक पद्धतीने विकास करणे आणि दूधगंगा नदीवर भाविकांच्या सुविधेसाठी घाट बांधणे.
उपस्थित मान्यवर:
याप्रसंगी चिक्कोडी जिल्हा काँग्रेस अध्यक्ष लक्ष्मणराव चिंगळे, कर्नाटक प्रदेश काँग्रेस महिला सदस्या सुप्रिया पाटील, बेडकिहाळ ग्रामपंचायत अध्यक्ष शिवानंद बीजले, सदस्य प्रमोदकुमार पाटील, जीवन यादव, माजी जिल्हा पंचायत सदस्य राजेंद्र पवार-वडर यांची प्रमुख उपस्थिती होती. तसेच अशोक आरगे, अनिल गोसावी, सज्जद मुल्ला, उमेश कोळी, कल्याण बीजले, अशोक धनाप्पगोळ, उमेश कुर्ले यांच्यासह ग्रामपंचायतीचे पदाधिकारी व कार्यकर्ते मोठ्या संख्येने उपस्थित होते.
