प्रेस मीडिया लाईव्ह’ च्या कायदेशीर सल्लागारपदी पुण्याच्या प्रसिद्ध वकील ॲड. अफसाना अन्सारी यांची नियुक्ती !
पुणे : महाराष्ट्रातील अग्रगण्य आणि पत्रकारिता तसेच सामाजिक क्षेत्रातील नामांकित वृत्तसंस्था आणि जागतिक कीर्तीच्या ‘वर्ल्ड बुक ऑफ रेकॉर्ड्स’मध्ये आपल्या कामगिरीची ‘त्रिशतकी नोंद’ (हॅट्रिक) करणाऱ्या ‘प्रेस मीडिया लाईव्ह’ च्या कायदेशीर सल्लागार म्हणून पुण्याच्या सुप्रसिद्ध वकील ॲड. अफसाना अन्सारी यांची अधिकृत नियुक्ती करण्यात आली आहे. ‘प्रेस मीडिया लाईव्ह’चे मुख्य संपादक व संस्थापक मेहबूब गुलाब सरजेखान यांनी आज या महत्त्वपूर्ण नियुक्तीची घोषणा केली.
गेल्या अनेक वर्षांपासून ‘प्रेस मीडिया लाईव्ह’ने जनसामान्यांचे प्रश्न, सामाजिक सुधारणा आणि प्रशासकीय पारदर्शकतेसाठी आवाज उठवून पत्रकारितेत आपले एक वेगळे आणि मानाचे स्थान निर्माण केले आहे. या उल्लेखनीय कार्याची दखल जागतिक पातळीवर घेतली गेली असून वृत्तसंस्थेने जागतिक पातळीवर सलग तीन वेळा विश्वविक्रम नोंदवण्याचा बहुमान मिळवला आहे. आता या वाढत्या विस्तारामध्ये वृत्तसंस्थेची कायदेशीर बाजू अधिक सक्षम करण्यासाठी ॲड. अफसाना अन्सारी यांच्यासारख्या अभ्यासू आणि अनुभवी महिला वकिलाची कायदेशीर सल्लागार म्हणून झालेली निवड अत्यंत महत्त्वाची मानली जात आहे.
ॲड. अफसाना अन्सारी या पुणे कायदेशीर क्षेत्रात आपल्या कायद्याच्या सखोल अभ्यासासाठी आणि अनेक गुंतागुंतीचे खटले यशस्वीरित्या हाताळण्यासाठी प्रसिद्ध आहेत. कायदेशीर सल्लागार म्हणून त्यांची नियुक्ती झाल्यामुळे ‘प्रेस मीडिया लाईव्ह’च्या लेखणीला आता कायद्याचे भक्कम कवच लाभले आहे.
या नियुक्तीबाबत बोलताना मुख्य संपादक मेहबूब गुलाब सरजेखान म्हणाले की, सत्य, निर्भीड पत्रकारिता आणि सामाजिक कार्य करत असताना कायद्याची योग्य साथ असणे गरजेचे असते. जागतिक स्तरावर सलग तीन विश्वविक्रम करणाऱ्या आमच्या संस्थेमध्ये ॲड. अफसाना अन्सारी यांचे स्वागत करताना आम्हाला आनंद होत आहे. त्यांच्या नियुक्तीमुळे ‘प्रेस मीडिया लाईव्ह’ची ताकद आणि कायदेशीर बाजू अधिक मजबूत झाली असून, भविष्यात कोणत्याही दबावाला बळी न पडता आमची संस्था जनहितार्थ कार्य करत राहील.
ॲड. अफसाना अन्सारी यांच्या या महत्त्वपूर्ण निवडीबद्दल पत्रकारिता, राजकीय, सामाजिक आणि कायदेशीर क्षेत्रातून त्यांच्यावर अभिनंदनाचा वर्षाव होत आहे.
