इचलकरंजीत भीमगर्जना ! महामानवाच्या चरणी ‘वस्त्रनगरी’ नतमस्तक; जनसागराचा कृतज्ञता सोहळा !
इचलकरंजी | ज्यांनी काळोखाच्या गर्भात पिचलेल्या कोट्यवधींच्या आयुष्यात ज्ञानाचा सूर्य उगवला, ज्यांच्या लेखणीने या देशाच्या लोकशाहीचे नंदनवन फुलवले, त्या महामानवाचा, भारतरत्न डॉ. बाबासाहेब आंबेडकरांचा आज इचलकरंजीत झालेला सोहळा म्हणजे केवळ एक कार्यक्रम नव्हता, तर तो कृतज्ञतेचा एक महापूर होता!
आज मंगळवार दि. १४ एप्रिल रोजी, भारतीय राज्यघटनेचे शिल्पकार डॉ. बाबासाहेब आंबेडकर यांच्या जयंतीनिमित्त संपूर्ण इचलकरंजी शहर भीममय झाले होते. स्टेशन रोडवरील बाबासाहेबांचा तो देखणा पूर्णाकृती पुतळा आज केवळ धातूचा राहिला नव्हता, तर तो कोट्यवधींच्या आशा-आकांक्षेचा दीपस्तंभ वाटत होता. इचलकरंजी महानगरपालिकेच्या वतीने जेव्हा महापौर उदय धातुंडे आणि आयुक्त पल्लवी पाटील यांनी त्या पवित्र मूर्तीला पुष्पहार अर्पण केला, तेव्हा वातावरणात उमटलेला ‘जय भीम’चा नारा आसमंतात दुमदुमला.
केवळ स्टेशन रोडच नव्हे, तर बाबासाहेब आंबेडकर हॉस्पिटल जवळील अर्धपुतळा आणि दवाखान्यातील प्रतिमेसमोरही नतमस्तक होताना उपस्थितांच्या डोळ्यांत एकच भाव होता— “बापा, तू होतास म्हणून आम्ही आहोत!”
या सोहळ्याला लोकप्रतिनिधींची गर्दीच जमली होती. आमदार डॉ. राहुल आवाडे यांच्या संयमी उपस्थितीने कार्यक्रमाला वजन प्राप्त झाले, तर उपमहापौर अनिल डाळ्या यांनीही भीमराया चरणी श्रद्धासुमनं अर्पण केली. या मंगल समयी स्थायी समिती सभापती सतीश मुळीक, परिवहन समिती सभापती अरुणा बचाटे, मागासवर्गीय समिती सभापती रुबन आवळे, शिक्षण समिती सभापती विद्या साळुंखे, महिला बालकल्याण सभापती रुपाली सातपुते, प्रभाग समिती सभापती सुशांत कलागते, आणि शिक्षण समिती उपसभापती पुनम माळी यांची प्रमुख उपस्थिती होती.
जणू इचलकरंजीचे संपूर्ण प्रशासनच आज संविधानाच्या या महान शिल्पकारासमोर नतमस्तक होण्यासाठी रस्त्यावर उतरले होते. नगरसेवक रवी रजपुते, राजू बोंद्रे, योगेश पाटील, अविनाश कांबळे, नगरसेविका प्रियांका इंगवले, मनिषा कुपटे यांच्यासह माजी नगरसेवक मनोज साळुंखे, दिलीप मुथा, संतोष कुपटे, प्रमोद बचाटे, दत्ता मांजरे आणि सचिन माळी यांनीही बाबासाहेबांच्या स्मृतीस वंदन केले.
प्रशासकीय यंत्रणेनेही अत्यंत आदराने या सोहळ्यात सहभाग नोंदवला. मुख्य लेखा अधिकारी विकास खोळपे, शहर अभियंता बाजीराव कांबळे, सहाय्यक आयुक्त रामचंद्र कांबळे, क्रीडा अधिकारी संजय शेटे, तसेच विजय राजापुरे, सदाशिव जाधव, संभाजी पोवार, प्रतिभा चौगुले, संजय कांबळे आणि महेश बुचडे यांसह अनेक मान्यवर यावेळी उपस्थित होते.
आजची इचलकरंजी ही केवळ ‘मँचेस्टर’ राहिली नव्हती, तर ती विचारांच्या संघर्षातून जन्मलेली एक नवी शक्ती वाटत होती. बाबासाहेबांच्या विचारांची मशाल इथल्या प्रत्येकाच्या मनात पेटलेली आहे, याचीच साक्ष आजच्या या सोहळ्याने दिली.
