संपादकीय:पुण्यात थंडी पळाली, निवडणुकीची ‘धग’ आली; आता कोण कोणाचे ‘दिवे’ लावणार?
पुण्याच्या गल्लीबोळांत सध्या थंडीचे नावोनिशाण उरलेले नाही. अहो, थंडी पळाली कुडकुडत आणि तिची जागा घेतली आहे ‘निवडणुकीच्या धगीने’! गल्लोगल्ली रिक्षांचे भोंगे ओरडू लागले आहेत. जो तो उठतोय आणि “आमच्याच चिन्हावर शिक्का मारा” म्हणून गळा काढतोय. हे रिक्षावरचे स्पिकर ऐकले की वाटते, पुण्याचा विकास रथात बसून नाही, तर या तीनचाकी रिक्षेत बसूनच येणार की काय?
काका-पुतण्यांचा ‘हायव्होल्टेज’ ड्रामा! यावेळच्या निवडणुकीचा सर्वात मोठा ‘धडाका’ तर युती आणि आघाड्यांच्या खेळात आहे. अजितदादा आणि शरद पवार यांच्यातील राजकीय फाटाफुटीनंतर आता जे ‘युती’चे नवे समीकरण मांडले जात आहे, त्याने पुण्याच्या राजकारणात मोठा भूकंप होणार हे नक्की! कालपर्यंत एकाच ताटात जेवणारे आता एकमेकांचे ताट खेचायला टपले आहेत. काका एका बाजूला आणि पुतण्या दुसऱ्या बाजूला, अशी ही ‘महाभारत’ सदृश लढाई पुण्याने कधी पाहिली नव्हती. ही युती म्हणजे सत्तेसाठी केलेली सोय आहे की जनतेसाठी केलेली ‘मलमपट्टी’, हे आता मतदारांनीच ठरवायचे आहे. या भूकंपाचे धक्के कोणाचे ‘गढ’ कोसळवतात आणि कोणाची ‘गादी’ वाचवतात, याकडे संपूर्ण महाराष्ट्राचे डोळे लागले आहेत!
‘साखरेपेक्षा गोड’ आणि ‘मधापेक्षा मऊ’! निवडणूक जवळ आली की, आमचे पुण्याचे उमेदवार इतके गोड बोलू लागतात की बिचाऱ्या साखरेलाही स्वतःची लाज वाटावी! कालपर्यंत रस्त्यावरून जाताना ओळख न देणारे हे ‘भावी’ नगरसेवक आज मतदारांच्या पायावर लोटांगण घालत आहेत. “आम्ही जनतेचे सेवक आहोत,” असे हे पोटतिडकीने सांगतात, तेव्हा आम्हाला प्रश्न पडतो—हे सेवक आहेत की मेवा खाण्यासाठी टपलेले ‘मेवेकरी’?
“बातमी द्या, पण…” आमचे पत्रकार मित्र सांगतात, उमेदवार साहेबांची एकच रट असते— “आमच्या बातम्यांना प्रसिद्धी द्या, पण तेवढं सोडून बोला!” अहो, ‘तेवढं’ म्हणजे नेमकं काय? तुमचे भ्रष्टाचार की तुमची निष्क्रियता? पुण्याच्या जनतेला आता सर्व काही कळू लागले आहे. निवडून आल्यावर विकास प्रभागाचा होणार की तुमच्या बंगल्याचा आणि गाडीचा, याचे उत्तर द्यायला आता जनता समर्थ आहे.
धुंडते रहे जाओगे! एकदा का गुलाल उधळला आणि गळ्यात विजयाची माळ पडली की, हे ‘जनतेचे सेवक’ असे काही अदृश्य होतात की त्यांना शोधण्यासाठी साक्षात सीबीआय लावावी लागेल! “निवडून आल्यावर आम्हाला शोधावे लागेल,” असा जो सूर आज मतदारांत उमटतोय, तो लोकशाहीसाठी भूषणावह नाही. कुणी किती ‘दिवे’ लावले आहेत, हे आता सभांमधून ऐकायला मिळत आहे. पण हे दिवे विकासाचे आहेत की केवळ निवडणुकीच्या झगमगाटाचे, हे मतपेटीच ठरवेल.
पुणेकर जागा झालाय! पुणे महानगरपालिकेच्या निवडणुकीने राजकीय वातावरण ढवळून निघाले आहे. थंडीतही घाम फोडणारे हे राजकारण आता रंगात आले आहे. पण उमेदवारांनी एक लक्षात ठेवावे—पुणेकर हा फक्त मिसळ आणि मस्तानीचा शौकीन नाही, तर तो डोळ्यात तेल घालून पाहणारा ‘जागृत’ नागरिक आहे. तुम्ही कितीही साखरेसारखे गोड बोला, पण तुमच्या गोडव्याला भुलून मतदान करण्याचा काळ आता संपला आहे.
