धक्कादायक : पेन एज्युकेशन सोसायटीचे अध्यक्ष वकील मंगेश नेने यांच्यावर बलात्काराचा गुन्हा दाखल
सुनील पाटील : खालापूर
रायगड भूषण पुरस्काराने सन्मानित आणि पेन एज्युकेशन सोसायटीचे अध्यक्ष तसेच प्रसिद्ध वकील मंगेश विश्वनाथ नेने यांच्या विरोधात कामोठे पोलीस ठाण्यात लैंगिक शोषण आणि फसवणुकीचा गंभीर गुन्हा दाखल करण्यात आला आहे. लग्नाचे आमिष दाखवून एका विधवा महिलेचे वारंवार शारीरिक शोषण केल्याचा आणि तिची आर्थिक फसवणूक केल्याचा आरोप त्यांच्यावर आहे.
काय आहे नेमकं प्रकरण..?
तक्रारदार महिला, जिला दोन मुले असून जिच्या पतीचे २०२३ मध्ये निधन झाले आहे, तिने दिलेल्या जबाबानुसार हा प्रकार एप्रिल २०२३ ते जानेवारी २०२५ दरम्यान घडला.
ओळख आणि आमिष: पीडित महिलेने नर्सिंग कॉलेजमधील अनुभवाच्या आधारे नोकरीसाठी नेने यांच्याकडे बायोडाटा दिला होता. नेने यांनी तिला नर्सिंग कॉलेजमध्ये प्रशासकीय कामाचे आश्वासन दिले.
भावनिक जाळे: नेने यांनी आपली पत्नी सोबत राहत नसल्याचे आणि लवकरच घटस्फोट होणार असल्याचे खोटे सांगून पीडित महिलेला प्रेमाच्या जाळ्यात ओढले.
इच्छेविरुद्ध संबंध: एप्रिल २०२३ मध्ये सीवूड्स येथील एका हॉटेलमध्ये नेने यांनी लग्नाचे आश्वासन देऊन महिलेच्या इच्छेविरुद्ध पहिल्यांदा शारीरिक संबंध प्रस्थापित केले.
बनावट लग्न: एप्रिल २०२४ मध्ये नेने यांनी भाड्याने घेतलेल्या फ्लॅटमध्ये वैदिक पद्धतीने लग्नाचा बनाव रचला. त्यानंतर ते वारंवार महिलेच्या कामोठे येथील घरी येऊन तिचे लैंगिक शोषण करत राहिले.
आर्थिक फसवणूक: आरोपीने अडचणीचे कारण सांगून महिलेकडून आणि तिच्या वडिलांकडून एकूण १ लाख ७० हजार रुपये उकळले. तसेच तिच्या नावे कर्ज काढण्यासाठी कागदपत्रांवर सह्या घेतल्याचेही तक्रारीत नमूद आहे.
बिंग फुटले आणि धमकी
सप्टेंबर २०२४ पासून नेने यांनी पीडितेशी संपर्क टाळण्यास सुरुवात केली. तपासादरम्यान महिलेला समजले की नेने यांचे अन्य एका महिलेशीही संबंध आहेत. जेव्हा पीडितेच्या बहिणीने चौकशी करण्याचा प्रयत्न केला, तेव्हा नेने यांनी तिला धमकावण्यास सुरुवात केली. अखेर नेने यांच्या पहिल्या पत्नीने पीडितेची भेट घेऊन सत्य परिस्थिती सांगितल्यानंतर आपली फसवणूक झाल्याचे महिलेच्या लक्षात आले.
पोलीस कारवाई
पीडित महिलेने कामोठे पोलीस ठाण्यात हजर राहून सविस्तर जबाब नोंदवला आहे. पोलिसांनी मंगेश विश्वनाथ नेने यांच्यावर कलम ६९, ३१८ (३) व अन्य संबंधित कलमान्वये गुन्हा दाखल केला आहे.
तपास अधिकारी: या प्रकरणाचा अधिक तपास पोलीस उपनिरीक्षक प्रियांका मॅडम करत आहेत.
एका प्रतिष्ठित संस्थेच्या अध्यक्षावर अशा प्रकारे गुन्हा दाखल झाल्याने शैक्षणिक आणि सामाजिक वर्तुळात मोठी खळबळ उडाली आहे.
