कोंढव्यात ‘घड्याळ’ बिघडलं, ‘तुतारी’ फाटली; मिठानगरात काँग्रेसचा ‘कडकडाट’!
कोंढवा: पुण्याच्या राजकारणात सध्या ‘घड्याळ’ आणि ‘तुतारी’च्या टायमिंगचा पार बोजवारा उडाला असून, कोंढव्याच्या मिठानगरमध्ये मात्र काँग्रेसच्या हाताची ‘पाचवी’ चांगलीच उजळताना दिसत आहे! प्रभाग क्रमांक १९ (कोंढवा खुर्द-कौसरबाग) मध्ये काँग्रेसच्या प्रचाराचा जो झंझावात सुरू आहे, तो पाहून प्रस्थापितांचे धाबे दणाणले नाहीत तरच नवल!
घड्याळ’ आणि ‘तुतारी’ एकच? मतदारांचा ‘करेक्ट कार्यक्रम’!
अजितदादांनी आपल्या खास शैलीत पुण्याच्या सभेत एक ‘बॉम्ब’ टाकला आणि सांगितले की, “घड्याळ आणि तुतारी एकच आहेत!” पण दादा, हा गोळा तुमच्याच अंगावर उलटलाय असं दिसतंय. कोंढव्यातील सुजाण मुस्लीम मतदारांनी हा ‘गौप्यस्फोट’ ऐकला आणि त्यांना कळून चुकलं की, इथं लढणारे राष्ट्रवादीचे दोन्ही गट म्हणजे ‘एकाच माळेचे मणी’ आहेत! भाजपशी छुप्या अर्थाने हातमिळवणी करणाऱ्या या शक्तींना आता कोंढव्याच्या जनतेने ‘चले जाव’चा नारा दिला आहे. “भले तो आमचा नातेवाईक असो वा मित्र, जो भाजपच्या विचारधारेशी जवळीक साधेल, त्याला आमचं मत नाही!” असा गुप्त पण जळजळीत संदेश गल्लीगल्लीत फिरत आहे.
बिल्डरांची ‘माया’ आणि नागरी समस्यांचा ‘कचरा’!
मिठानगरच्या गल्लीबोळातून फिरताना एकच चर्चा ऐकू येतेय – ती म्हणजे विद्यमान नगरसेवकांनी बिल्डरांशी संधान बांधून केलेली ‘माया’ आणि सामान्य जनतेच्या वाट्याला आलेला नागरी समस्यांचा ‘वनवास’! बेकायदेशीर बांधकामांना खतपाणी घालताना इथले रस्ते, पाणी, वीज आणि कचऱ्याचा प्रश्न मात्र जैसे थे आहे. जनतेशी तुटलेला संपर्क आणि अपुरी विकासकामे यामुळे मतदारांनी आता या ‘जुन्या’ चेहऱ्यांना घरचा रस्ता दाखवण्याचे मनोमन ठरवले आहे.
काँग्रेसचे ‘चार शिलेदार’ मैदानात!
सध्या मिठानगरात काँग्रेसमय वातावरण असून, प्रभाग १९ मधील काँग्रेसचे अधिकृत उमेदवार:
१९ अ: तस्लीम हसन शेख
१९ ब: असिया मणियार
१९ क: काशिफ सय्यद
१९ ड: तेहझीब सिद्दीकी
या नव्या दमाच्या उमेदवारांना मिळणारा प्रतिसाद पाहता, कोंढव्यातून धर्मनिरपेक्षतेचा झेंडा पुन्हा एकदा डौलाने फडकणार हे निश्चित मानले जात आहे. आता ‘घड्याळ’ वेळेवर चालणार की ‘तुतारी’ वाजणार, यापेक्षा काँग्रेसचा ‘हात’ इथल्या जनतेला अधिक आश्वासक वाटत आहे, हेच आजच्या रॅलीचे सार आहे!
