पुणे महापालिका रणांगण : ‘कमळ’ फुलवणे यंदा आव्हानात्मक; भाजपने गाफील राहू नये,
:पुणे महानगरपालिकेच्या आगामी निवडणुकीसाठी सर्वच राजकीय पक्षांनी कंबर कसली आहे. गेल्या पंचवार्षिक निवडणुकीत एकहाती सत्ता मिळवणाऱ्या भारतीय जनता पक्षासाठी यंदाची वाटचाल ‘काटेरी’ असण्याची शक्यता आहे. राजकीय वर्तुळात अशी चर्चा रंगू लागली आहे की, भाजपने पुण्यातील हे रणांगण ‘हलक्यात’ घेणे त्यांना महागात पडू शकते.
कसबा पोटनिवडणुकीची टांगती तलवार
काही महिन्यांपूर्वी झालेल्या कसबा पेठ पोटनिवडणुकीत भाजपच्या बालेकिल्ल्याला पडलेले खिंडार हा पक्षासाठी धोक्याचा इशारा मानला जात आहे. पुणेकर मतदार आता केवळ पक्षाच्या नावावर नाही, तर स्थानिक प्रश्न आणि उमेदवाराच्या जनसंपर्कावर मत देत असल्याचे स्पष्ट झाले आहे. त्यामुळे जुन्या पुण्यातही भाजपला यंदा कडवे आव्हान मिळणार आहे.
महाविकास आघाडी’चे तगडे आव्हान
गेल्या वेळी भाजपला विरोधी पक्षांच्या विखुरलेल्या मतांचा फायदा झाला होता. मात्र, यंदा शरद पवारांची राष्ट्रवादी, उद्धव ठाकरेंची शिवसेना आणि काँग्रेस जर एकवटली, तर मतांचे विभाजन थांबून भाजपच्या जागांना फटका बसू शकतो. विशेषतः पुण्याच्या उपनगरांमध्ये (हडपसर, खडकवासला, वडगाव शेरी) राष्ट्रवादीचा वाढता प्रभाव भाजपची डोकेदुखी वाढवणारा ठरू शकतो.
हे मुद्दे ठरणार कळीचे:
वाहतूक कोंडी आणि मेट्रोची संथ गती: पुण्यातील रखडलेले प्रकल्प आणि दररोजची वाहतूक कोंडी यामुळे पुकर त्रस्त आहेत.
पाणी टंचाई :
अनेक उपनगरांमध्ये टँकर लॉबीचा असलेला प्रभाव आणि महापालिकेचे अपयश हा प्रचाराचा मुख्य मुद्दा ठरेल.
अंतर्गत बंडखोरी :
भाजपमध्ये इच्छुकांची संख्या मोठी असल्याने, तिकीट वाटपानंतर बंडखोरी रोखण्याचे मोठे आव्हान प्रदेश नेतृत्वासमोर असेल. कार्यकर्त्यांमधील मरगळ आणि सत्ताविरोधी लाट पाच वर्षे सत्तेत राहिल्यामुळे काही प्रभागांमध्ये विद्यमान नगरसेवकांविरुद्ध रोष आहे. त्यातच प्रदीर्घ काळ प्रशासक राजवट असल्याने जनतेचे प्रश्न सुटलेले नाहीत. या परिस्थितीचा फायदा घेण्यासाठी विरोधकांनी आक्रमक पवित्रा घेतला आहे.
राजकीय तज्ज्ञांचे मत:
“पुणे हा भाजपचा गड असला तरी, यंदाची परिस्थिती २०१७ सारखी नाही. मतदारांची मानसिकता बदलली आहे. जर भाजपने सूक्ष्म नियोजन केले नाही आणि केवळ मोठ्या नेत्यांच्या सभांवर अवलंबून राहिले, तर पुण्याच्या निकालात मोठा उलटफेर पाहायला मिळू शकतो.”
