शाहूंच्या कोल्हापुरात बळीराजाची लूट ! स्वाक्षरीविनाच लाखो रुपये गायब; पँथर आर्मीचे बेमुदत उपोषण!
कोल्हापूर : राजर्षी शाहूंच्या करवीर नगरीत, जिथे न्यायाचा झरा सदैव वाहतो, तिथेच एका दलित अल्पभूधारक शेतकऱ्याच्या कष्टाच्या पैशावर दरोडा टाकण्याचा संतापजनक प्रकार उघडकीस आला आहे. राधानगरी तालुक्यातील गवशी येथील श्री. खंडोबा विकास सेवा संस्थेने एका साध्याभोळ्या शेतकऱ्याची केलेली ही आर्थिक फसवणूक म्हणजे सहकार क्षेत्रातील नीतिमत्तेचा अंतच म्हणावा लागेल. या अन्यायाचा जाब विचारण्यासाठी ‘पँथर आर्मी स्वराज्य क्रांती सेने’ने आजपासून जिल्हाधिकारी कार्यालयासमोर बेमुदत उपोषणाचे रणशिंग फुंकले आहे.
हे प्रकरण वाचले की सहकारात कशी लुटालूट चालते, याचा धक्कादायक प्रत्यय येतो. पीडित शेतकरी शहाजी संभाजी कांबळे यांच्या खात्यावर १९ मे २०२२ रोजी अचानक १ लाख ९ हजार रुपये जमा केले जातात आणि त्याच दिवशी, कोणतीही विड्रॉवल स्लिप किंवा स्वाक्षरी नसताना १ लाख २९ हजार रुपये परस्पर काढून घेतले जातात. हा जादुई प्रकार घडलाच कसा? इतकेच नव्हे, तर कांबळे यांच्या कुटुंबाने कष्ट करून पिकवलेल्या ऊसाचे कारखान्याकडून आलेले ४ लाख रुपयेही संबंधित संस्थेने बेकायदेशीरपणे स्वतःच्या घशात घातले आहेत. कष्टकऱ्याच्या घामाची ही अशी क्रूर थट्टा पाहून माणुसकीलाही पाझर फुटल्याशिवाय राहत नाही.
‘पँथर आर्मी’चे जिल्हाध्यक्ष मच्छिंद्र रुईकर यांच्या नेतृत्वाखाली हे आंदोलन अत्यंत आक्रमकपणे सुरू झाले आहे. आम्ही पोलीस आणि सहकार विभागाचे दरवाजे वारंवार ठोठावले, पण प्रशासनाला अद्याप जाग आलेली नाही; दोषींना वाचवण्याचा हा प्रयत्न लोकशाहीसाठी घातक आहे, अशा शब्दांत रुईकर यांनी आपला रोष व्यक्त केला. या आंदोलनाद्वारे म्हासुर्ली बँकेचे तत्कालीन मॅनेजर संभाजी पाटील, संस्थेचे चेअरमन सर्जेराव पाटील व संपूर्ण संचालक मंडळावर तात्काळ फौजदारी गुन्हे दाखल करण्याची मागणी करण्यात आली आहे. तसेच, पीडित शेतकऱ्याची हडप केलेली ४ लाख रुपयांची रक्कम व्याजासह परत मिळावी आणि संस्थेच्या सर्व व्यवहारांची तातडीने ‘ऑडिट’ चौकशी व्हावी, असा पवित्रा आंदोलकांनी घेतला आहे.
या उपोषणात पँथर आर्मीचे संस्थापक संतोष आठवले, राष्ट्रीय संघटक अमोल कुरणे, समीर विजापुरे, जिल्हाध्यक्ष मच्छिंद्र रुईकर, जिल्हा महासचिव नितेश कुमार दिशांत, जिल्हा उपाध्यक्ष भैय्यासाहेब धनवडे व पीडित शेतकरी शहाजी कांबळे यांच्यासह शेकडो कार्यकर्ते आणि ग्रामस्थ सहभागी झाले आहेत. जोपर्यंत शोषितांना न्याय मिळत नाही आणि दोषींना तुरुंगाची हवा दाखवली जात नाही, तोपर्यंत हे उपोषण मागे घेतले जाणार नाही, असा खंबीर निर्धार करण्यात आला आहे. आता या गरिबाच्या हाकेला जिल्हा प्रशासन कधी प्रतिसाद देते, हे पाहणे महत्त्वाचे ठरेल.
