मोहोळांच्या वाढत्या ताकदीमुळे अजित पवार अॅक्शन मोड मध्ये !
पुणे: पुण्याचे राजकीय वातावरण सध्या कमालीचे तापले असून जिल्ह्याच्या राजकारणात आता दोन बलाढ्य शक्ती आमनेसामने आल्या आहेत. राष्ट्रवादीचे सर्वेसर्वा आणि उपमुख्यमंत्री अजित पवार (दादा) आणि भाजपचे केंद्रातील उगवते नेतृत्व मुरलीधर मोहोळ (अण्णा) यांच्यातील सुप्त संघर्ष आता उघड झाला आहे. मोहोळांच्या वाढत्या राजकीय प्रभावामुळे अजित पवारांनी आता आक्रमक पवित्रा घेतला असून, पुण्यात ‘दादा विरुद्ध अण्णा’ असा हायव्होल्टेज सामना रंगणार असल्याचे स्पष्ट झाले आहे.
संस्थात्मक वर्चस्वातून संघर्षाला सुरुवात
महाराष्ट्र ऑलिम्पिक असोसिएशनच्या निवडणुकीने या संघर्षाला खरी धार दिली. गेली कित्येक वर्षे या संस्थेवर अजित पवारांची एकहाती सत्ता होती. मात्र, यावेळी मुरलीधर मोहोळ यांनी केवळ निवडणूक लढवलीच नाही, तर पवारांच्या कार्यपद्धतीवर गंभीर प्रश्नचिन्ह उपस्थित केले. या निवडणुकीत झालेली ‘शाब्दिक चकमक’ ही केवळ एका संस्थेपुरती मर्यादित नसून, ती पुण्याच्या नेतृत्वाच्या वर्चस्वाची लढाई असल्याचे मानले जात आहे.
अजित पवार ‘ॲक्शन मोड’मध्ये का..?
राजकीय विश्लेषकांच्या मते, अजित पवार अॅक्शन मोडमध्ये येण्यामागे काही प्रमुख कारणे आहेत:
मोहोळांची केंद्रातील झेप : मुरलीधर मोहोळ यांनी पहिल्याच प्रयत्नात खासदार होऊन थेट केंद्रीय राज्यमंत्री पद मिळवले. यामुळे पुणे शहरावर भाजपची पकड घट्ट होत आहे.
आगामी महानगरपालिका निवडणूक: पुणे महापालिकेत राष्ट्रवादीचे वर्चस्व पुन्हा मिळवण्यासाठी अजित पवारांना मोहोळांच्या रूपात मोठ्या आव्हानाचा सामना करावा लागणार आहे.
आरोपांचे राजकारण: मोहोळ यांनी असोसिएशनच्या कारभारावर केलेल्या आरोपांमुळे अजित पवारांनी ही बाब प्रतिष्ठेची केली आहे.
पुण्याच्या राजकारणात नवी समीकरणे.?
महायुतीमध्ये एकत्र असूनही पुणे शहराच्या नेतृत्वावरून दोन्ही नेत्यांमध्ये ओढाताण सुरू आहे. एकीकडे अजित पवारांचा प्रदीर्घ अनुभव आणि प्रशासनावर असलेली पकड आहे, तर दुसरीकडे मुरलीधर मोहोळ यांच्या पाठीशी असलेला भाजपचा मोठा संघटनात्मक पाठिंबा आणि तरुणांमधील त्यांची लोकप्रियता आहे.
“पुणे कोणाचे..? दादांचे की अण्णांचे? या प्रश्नाचे उत्तर आगामी निवडणुकांच्या निकालांतून मिळणार असले, तरी सध्याच्या संघर्षाने कार्यकर्त्यांमध्ये मोठा उत्साह संचारला आहे.”
