गणपती बाप्पा मोरया, १२ वाजेपर्यंत वाजवू द्या! पुण्याच्या सणासुदीला शासनाचा ‘हिरवा कंदील’!
पुणे विशेष प्रतिनिधी “पुणेकर हो, आता उत्सवाचा गुलाल उधळा आणि ढोल-ताशांचा गजर करा; कारण प्रशासनाने तुमच्या आनंदावरची ‘दहा’ची टांगती तलवार अखेर म्यान केली आहे!”
पुणे आणि सार्वजनिक उत्सव हे समीकरण जागतिक आहे. पण गेल्या काही वर्षांत रात्री १० वाजले की पोलिसांच्या शिट्ट्या आणि कायद्याचा बडगा यामुळे उत्सवाचा उत्साह ओसरत होता. पुणेकर आणि पोलीस यांच्यात होणारी बाचाबाची ही नित्याचीच बाब झाली होती. मात्र, आता २०२६ या वर्षासाठी जिल्हाधिकारी जितेंद्र डुडी यांनी पुणेकरांच्या भावनांची दखल घेत एक ‘धडाकेबाज’ आदेश जारी केला आहे. केंद्र शासनाच्या ध्वनी प्रदूषण नियमन सुधारित नियम २०१७ नुसार, वर्षातील महत्त्वाच्या १५ दिवसांसाठी ध्वनीक्षेपकाची मर्यादा रात्री १० वरून थेट १२ वाजेपर्यंत वाढवण्यात आली आहे!
जल्लोषाचे १५ दिवस!
जिल्हाधिकाऱ्यांच्या आदेशानुसार, पहाटे ६ ते रात्री १२ वाजेपर्यंत लाऊडस्पीकर लावता येणार आहे. यामध्ये प्रामुख्याने खालील दिवसांचा समावेश आहे:
शिवजयंती (१९ फेब्रुवारी): शिवरायांच्या जयघोषाने पुणे दुमदुमणार!
डॉ. बाबासाहेब आंबेडकर जयंती (१४ एप्रिल): भीमगर्जना आता मध्यरात्रीपर्यंत घुमणार.
महाराष्ट्र दिन (१ मे): राज्याच्या अस्मितेचा सोहळा.
गणेशोत्सव व ईद-ए-मिलाद: सप्टेंबर महिन्यात १९, २०, २२, २३, २४ आणि २५ तारखेपर्यंत तब्बल ६ दिवस बाप्पाच्या आगमनापासून विसर्जनापर्यंत सलग सूट!
नवरात्री उत्सव: १९ आणि २० ऑक्टोबरला गरब्याचा फेर धरता येणार.
नाताळ व थर्टी फर्स्ट: २५ आणि ३१ डिसेंबरला सरत्या वर्षाला दिमाखात निरोप देता येईल.
राखीव दिवस: महत्त्वाच्या स्थानिक कार्यक्रमांसाठी २ दिवस प्रशासनाने राखून ठेवले आहेत.
आवाज वाढव, पण नियम पाळ!
ही सवलत देताना जिल्हाधिकाऱ्यांनी पुणेकरांना एक प्रेमळ ‘इशारा’ही दिला आहे. उत्सव साजरा करताना आवाजाची विहित मर्यादा (डेसिबल लिमिट) पाळणे बंधनकारक आहे. ही सूट ‘सायलेन्स झोन’ म्हणजेच रुग्णालय, शिक्षण संस्था आणि न्यायालयांच्या परिसरात लागू असणार नाही. “शासनाने दिलेली ही सवलत पुणेकरांच्या आनंदासाठी आहे, त्याचा गैरवापर होऊ नये आणि नियमांचे पालन करून प्रशासनाला सहकार्य करावे,” असे आवाहन जिल्हाधिकारी जितेंद्र डुडी यांनी केले आहे.
आमचा ‘मराठा’ बाणा: प्रशासनाने मनाचा मोठेपणा दाखवून दोन तास वाढवून दिले आहेत. आता चेंडू पुणेकरांच्या कोर्टात आहे. शिस्त पाळून आणि संस्कृती जपून असा काही सण साजरा करा की, नियम मोडण्याची वेळच येणार नाही.
