नूर फातिमाचा कराटेत ‘सुवर्ण’ कडाका ! हिंजवडीच्या विलू पूनावाला शाळेचा झेंडा फडकवला!
पुण : ज्या वयात मुले खेळण्यांच्या दुनियेत रमलेली असतात, त्या वयात हिंजवडीच्या एका रणरागिणीने आपल्या हाताच्या प्रहारांनी आणि पायांच्या चपळाईने ‘सुवर्ण’ इतिहास घडवला आहे! निमित्त होते, हिंजवडीच्या विठ्ठल लॉन्सवर रंगलेल्या ९ व्या राज्यस्तरीय कराटे चॅम्पियनशिपचे. या स्पर्धेत नूर फातिमा सय्यद या चिमुरड्या खेळाडूने आपल्या प्रतिपक्षाला आस्मान दाखवत सुवर्णपदकावर आपले नाव कोरले आहे.
मैदानावर नूरचा दरारा..!
महाराष्ट्रभरातून आलेले मल्ल आणि त्यांच्यातील ती चुरस! पण नूर फातिमाच्या डोळ्यात जिद्द होती आणि मनगटात वाघाचे बळ होते. अली सय्यद यांची ही कन्या जेव्हा मॅटवर उतरली, तेव्हा तिने तंत्र आणि बळाचा असा काही संगम घडवून आणला की पाहणारेही थक्क झाले. समोरून येणारा प्रत्येक वार तिने शिताफीने परतावून लावला आणि अखेर सुवर्णपदकाला गवसणी घातली.
शाळेचा अभिमान, गुरूंचा आशीर्वाद..!
नूरच्या या विजयाने विलू पूनावाला इंग्लिश मीडियम स्कूलचा परिसर आनंदाने न्हाऊन निघाला आहे. एखाद्या हिऱ्याला पैलू पाडावेत तसे नूरच्या गुणांना या शाळेने जोपासले. शाळेच्या प्राचार्या सुरेखा लांडगे आणि शिक्षिका वैष्णवी शाह यांनी नूरचे कौतुक करताना म्हटले की, “नूरने केवळ पदक जिंकले नाही, तर शाळेच्या शिरपेचात मानाचा तुरा रोवला आहे.”
“जिद्द असेल तर आभाळही ठेंगणे होते, हेच नूर फातिमाने आपल्या कर्तृत्वाने सिद्ध करून दाखवले आहे!”
नूरच्या या दैदिप्यमान यशाबद्दल सध्या संपूर्ण हिंजवडी परिसरातून आणि क्रीडा वर्तुळातून तिच्यावर कौतुकाचा आणि अभिनंदनाचा वर्षाव होत आहे. ही तर केवळ सुरुवात आहे, भविष्यात ही कन्या भारताच्या क्रीडा क्षितिजावर ध्रुव ताऱ्यासारखी चमकेल यात शंका नाही!
