नवरदेव बोहल्यावर की पालिकेच्या पायरीवर..? अबू हनीफ हॉलचा ताबा सुटेना, नोंदणीचा गोंधळ मिटेना..!
पुण्यात सध्या उन्हाच्या चटक्यांपेक्षा लग्नाचेच वारे जास्त वाहत आहेत. पण कोंढवा बुद्रुकमधील त्या “अबू हनीफ बहुउद्देशीय सभागृहाबाबत” मात्र भलताच ‘झोल’ सुरू असल्याचे समोर येतेय. अहो, कागदपत्रे तर ओरडून सांगतायत की हे सभागृह साक्षात पुणे महानगरपालिकेच्या मालकीचे आहे! म्हणजे मालक सरकार आणि कारभारी मात्र भलतेच? यालाच म्हणतात, “मालकाचे घर आणि सणसणत फिरतोय भाडेकरू!”
कराराचा खेळ अन् ताबा कोणाचा..?
पुणेकरांनो, हे सभागृह पूर्वी एका संस्थेला कराराने दिले होते. आता तो करार कधीच निकालात निघालाय, पण ताबा सोडायला मात्र कोणाचे पाय निघेनात. करार संपला तरी जागा बळकावून बसणे, हे कोणत्या संस्कृतीत बसते? ताबा कोणाकडे, याचा पत्ता नसताना तिथे लग्नांच्या नोंदणीचा बाजार मात्र जोरात सुरू आहे. कुणीतरी तिथे पैसे मोजणार आणि ऐन लग्नाच्या दिवशी महापालिका तिथे ‘टाळं’ घेऊन उभी ठाकली, तर नवरदेवाला बोहल्यावर चढण्याऐवजी पालिकेच्या पायऱ्या चढत फिरावं लागेल!
आज पालिकेचा ‘हल्लाबोल’!
आज ७ मे रोजी महापालिकेने या सभागृहाचा ताबा घेण्यासाठी कंबर कसली आहे. कोणताही राडा होऊ नये आणि कायदा-सुव्यवस्था टिकावी, म्हणून चक्क पोलीस उपायुक्तांकडे तगड्या बंदोबस्ताची मागणी केली आहे. म्हणजे एकीकडे मांडवात सनईचे सूर वाजण्याची स्वप्ने पाहिली जात असतील, तर दुसरीकडे सरकारी गाड्यांचे सायरन वाजण्याची दाट शक्यता आहे.
सावधान पुणेकर..!
ज्या सभागृहाची कायदेशीर कुंडलीच मांडवाबाहेर आहे, तिथे आनंदाचे सोहळे साजरे करणे म्हणजे स्वतःच्या पायावर धोंडा पाडून घेण्यासारखे आहे. “स्वस्त मिळतेय” म्हणून भुलू नका. ऐनवेळी पालिकेने कारवाई केली, तर तुमचे पैसे तर जातीलच, पण सोहळ्याचा जो काही ‘बेरंग’ होईल, त्याला जबाबदार कोण?
त्यामुळे कोणतीही रक्कम मोजण्यापूर्वी नीट शहानिशा करा. अन्यथा, अक्षता पडण्याऐवजी पालिकेचा ‘दंडाचा फटका’ बसेल, हे नक्की!
