मिरजच्या आर. एम. हायस्कूल मध्ये डॉ. ठोंबरेंचा कडक ‘डोस ‘; मैद्याच्या राक्षसाला गाडा आणि खपली गव्हाची मशाल पेटवा !
अशोक मासाळ :
शाळा म्हणजे काय? पोरांच्या पाठीवर पुस्तकांचे दगड लादणारी एखादी सिमेंटची कोठडी? छे, मुळीच नाही! शाळा म्हणजे विचारांची पेरणी करणारी एक जिवंत आणि रसरशीत प्रयोगशाळा असते, हे आज मिरजच्या आर. एम. हायस्कूल आणि आदर्श विद्यालयाने सप्रमाण सिद्ध करून दाखवले. निमित्त होते डॉ. प्रतापसिंह ठोंबरे यांच्या झणझणीत व्याख्यानाचे. विषयाचे नाव जरी ‘आहार, विहार आणि विचार’ असे साधेसुधे असले, तरी डॉ. ठोंबरेंनी ज्या पद्धतीने विद्यार्थ्यांच्या मेंदूत विचारांचे अंजन घातले, तो पाहता याला व्याख्यान न म्हणता ‘आरोग्य क्रांतीची गर्जना’ म्हणणेच अधिक संयुक्तिक ठरेल!
कुरकुरे खाणाऱ्या पिढीला ‘कुरकुरीत’ विचारांची गरज!
आजची ही चहाच्या पेल्यात बुडलेली आणि मैद्याच्या विळख्यात अडकलेली कोवळी पिढी पाहून काळजात धस्स होते. आजचा विद्यार्थी हातामध्ये महागडा मोबाईल घेऊन फिरतो, पण स्वतःच्या शरीराचे आणि मनाचे नाते मात्र कुठेतरी हरवून बसला आहे. याच विसंगतीवर डॉ. ठोंबरेंनी शब्दांचे आसूड ओढले. ते गर्जले, “अरे, आपण जे खातो, तसेच आपण बनतो! मग काय आपण स्वतःचे रूपांतर कचऱ्यात करणार आहोत का?”
जाहिरातींच्या चकाकीला भुलून ‘बाहेरचे’ घातक अन्न पोटात ढकलणाऱ्या पोरांना त्यांनी स्पष्ट इशारा दिला. चहा, मैदा आणि प्लास्टिकच्या अंशाने माखलेले अन्न म्हणजे केवळ आहार नसून तो शरीरातील रक्ताला कृत्रिम बनवणारा स्लो-पॉइझनचा साठा आहे. या ऐवजी खपली गहू, घाण्यावरचे तेल आणि देशी वाणाचे महत्त्व सांगताना त्यांनी भारतीय परंपरेचा झेंडा पुन्हा एकदा अभिमानाने फडकवला.
टाळ्यांच्या गजरापेक्षा आचरणाची जिद्द हवी!
कार्यक्रमाचे अध्यक्ष मिलिंद जाधव यांनी तर अधिकच मर्मवेधी भाष्य केले. ते म्हणाले की, “फक्त टाळ्या वाजवून डॉक्टरांच्या विचारांचे स्वागत करणे सोपे आहे, पण ते विचार ताटात आणि आचरणात उतरवणे हेच खरे शौर्य आहे!” हे विचार केवळ विद्यार्थ्यांपर्यंत न राहता पालकांच्या उंबरठ्यापर्यंत पोहोचले पाहिजेत, तरच या ज्ञानाच्या यज्ञाचे सार्थक होईल, अशी साद त्यांनी शिक्षकांना घातली.
यावेळी व्यासपीठावर मुख्याध्यापक सुनील भातमारे, सौ. पाटील मॅडम, अशोक मासाळ आणि इतर शिक्षकवृंद उपस्थित होता. कार्यक्रमाचे प्रास्ताविक एस. के. भोसले यांनी केले, तर आभार मानण्याचे सोपस्कार कोकरे मॅडम यांनी पार पाडले.
थोडक्यात पण गोड सांगायचे तर…
शिक्षण म्हणजे केवळ पदव्यांची कागदपत्रे गोळा करणे नव्हे, तर ‘आहार शुद्ध, विहार संयमी आणि आचरण प्रामाणिक’ ठेवण्याची शिस्त लावणे होय. मिरजेच्या या शाळेत आज खऱ्या अर्थाने जीवनाची एक ‘नवी पहाट’ उगवली आहे. आता खरी परीक्षा विद्यार्थ्यांची आहे—त्यांनी डॉ. ठोंबरेंचा हा आरोग्याचा मंत्र किती निष्ठेने जपला, हे त्यांच्या भविष्यातील सुदृढ शरीरावरूनच जगाला कळेल!
