पेणच्या निसर्गरम्य कुशीत पापाचा चिखल; पोलिसांच्या ‘बनावट ग्राहकां’नी वाजविले नराधमांचे बारा !
प्रेस मीडिया लाईव्ह :
सुनील पाटील :
पेण: ज्या भूमीत गणपती बाप्पांच्या पवित्र मूर्ती घडवल्या जातात, त्या पेणच्या मातीला वासनेचा विळखा घालू पाहणाऱ्या नराधमांना अखेर पोलिसांनी ‘खाकी’चा इंगा दाखवला आहे! बोरगावच्या **’सेलिब्रेशन रिसॉर्ट’**मध्ये आनंदाचा उत्सव नाही, तर असहाय्य महिलांच्या शोषणाचं बीभत्स प्रदर्शन मांडलं गेलं होतं. पण म्हणतात ना, ‘पापाचा घडा भरला की तो फुटणारच!’ पोलीस अधीक्षक आंचल दलाल आणि त्यांच्या फौजेने तो घडा फोडलाच नाही, तर पार धुळीस मिळवला आहे!
रात्रीचा थरार: बनावट ग्राहक आणि पोलिसांची झडप!
पेणचे पोलीस निरीक्षक संदीप बागुल यांना खबऱ्याकडून पक्की टीप मिळाली होती की, ‘सेलिब्रेशन’च्या बंद दाराआड देहविक्रयाचा घाणेरडा बाजार भरला आहे. वरिष्ठांच्या मार्गदर्शनाखाली सोमवारी (२३ मार्च) रात्री ८:४० च्या सुमारास पोलिसांनी चक्रव्यूह रचला. दोन ‘बनावट ग्राहक’ रिसॉर्टमध्ये पाठवण्यात आले. जेव्हा दलालांनी खात्री पटवून सौदा पक्का केला, तेव्हाच दबा धरून बसलेल्या पोलीस पथकाने झडप घातली! तोपर्यंत या पापी व्यापाऱ्यांना कल्पनाही नव्हती की समोर गिऱ्हाईक नाही, तर साक्षात ‘यमदूत’ उभे आहेत!
कोण आहेत हे नराधम ? या कारवाईत पोलिसांनी झुल्फीकार जलाल उद्दीन (पनवेल), खगेंद्र कंबु मलीक, देवेंद्र धर्मा पाटील (पेण) आणि रविंद्र खेत्रमोहन मलीक (अलिबाग) या चौघांच्या मुसक्या आवळल्या आहेत. स्वतःच्या तिजोरी भरण्यासाठी तीन महिलांच्या आयुष्याचा लिलाव करणाऱ्या या नराधमांना आता कोठडीत चक्की पिसण्याशिवाय पर्याय उरलेला नाही. पोलिसांनी या छाप्यात रोख रक्कमेसह मुद्देमाल जप्त केला असून, भारतीय न्यायसंहिता आणि अनैतिक व्यापार प्रतिबंधक कायद्याच्या कलमांखाली गुन्हा नोंदवला आहे.
जनतेचा संतप्त सवाल: अजून किती ‘सेलिब्रेशन’ बाकी ? आज पेण-अलिबाग पट्ट्यात जागोजागी फुटलेल्या अळंबीसारखी रिसॉर्ट्स आणि फार्महाऊस उभी राहिली आहेत. ‘ऑनलाइन बुकिंग’च्या नावाखाली या बंद दारांआड काय ‘ऑफलाइन’ उद्योग चालतात, याची सामान्यांना कल्पनाही नसते. प्रत्येक फार्म हाऊसवर पोलीस पहारा देऊ शकत नाहीत हे मान्य, पण अशा संशयास्पद ठिकाणांची सखोल चौकशी आता व्हायलाच हवी, हीच जनतेची आग्रही मागणी आहे.
सुदैवाने, या कारवाईत तीन पीडित महिलांची सुटका करून पोलिसांनी माणुसकीची ज्योत तेवत ठेवली आहे. पण अशा घटनांमुळे रायगडच्या आदरातिथ्याला लागलेला हा डाग पुसण्यासाठी पोलिसांनी आता ‘सळो की पळो’ करून सोडावे, हेच नसे थोडके!
