संकटांच्या छाताडावर प्रहार अन् औद्योगिक क्रांतीचा जयजयकार! बेंडखळे यांच्या संघर्षाचा विट्यात ‘राज्याभिषेक’!
–सांगली जिल्हा अशोक मासाळ :
सांगलीच्या या रणझुंजार मातीचा गुणच असा आहे की, इथला माणूस एकदा पेटून उठला की इतिहासाची पानंही थरथर कापायला लागतात! शून्यातून विश्व निर्माण करणं ही काही लेच्यापेच्यांची गोष्ट नाही, पण संकटांच्या काळजावर पाय देऊन आणि परिस्थितीच्या छाताडावर प्रहार करून आपला औद्योगिक विजयाचा झेंडा फडकवणारा एक मर्दाचा गडी आज विट्याच्या क्षितिजावर तळपत आहे— त्यांचे नाव आहे रवींद्र बेंडखळे.
हा केवळ एका उद्योजकाचा सत्कार नाही, तर हा एका जिद्दीच्या ज्वालामुखीचा झालेला राज्याभिषेक आहे!
श्रद्धेचा हिमालय आणि कष्टाचा महासागर..!
रवींद्र बेंडखळे हे नाव आज केवळ व्यक्ती राहिले नसून ती एक धगधगती चळवळ झाली आहे. सामान्य कुटुंबात जन्मलेला हा माणूस, पण स्वप्न मात्र आकाशाला गवसणी घालणारी! खिशात दमडी नसताना आणि हातात कोणतेही पाठबळ नसताना त्यांनी आपल्या संघर्षाला प्रारंभ केला. पण त्यांच्या पाठीशी उभा होता तो ‘सद्गुरु श्री अनिरुद्ध बापू’ यांच्यावरील अढळ श्रद्धेचा पर्वत! शंभर नव्हे, तर ‘एकशे आठ’ टक्के श्रद्धेच्या बळावर त्यांनी कष्टाचा असा काही डोंगर उभा केला की, आज मोठे मोठे दिग्गजही चकित झाले आहेत.
माणुसकीचा कारखाना..!
विटा एमआयडीसीमध्ये जेव्हा अनेक तरुण केवळ नशिबाला दोष देत बसले होते, तेव्हा बेंडखळे यांनी स्वतः कामगार होऊन घामाचा अभिषेक केला. आज त्यांच्या कष्टाच्या कणाकणातून उभ्या राहिलेल्या डायमंड पॉलिमर्स, युनिक पॉलिमर्स, नोबेल प्राइम आणि किमया टेक्नॉलॉजी यांसारख्या संस्था म्हणजे केवळ सिमेंट-काँक्रीटचे इमले नाहीत; तर हजारो कुटुंबांच्या चुली पेटवणारे ते माणुसकीचे दीपस्तंभ आहेत. या प्रवासात त्यांचे स्नेही कवठेकर साहेब यांच्या तांत्रिक ज्ञानाची जोड या औद्योगिक क्रांतीला लाभली आहे.
यशोगाथेचा सुवर्णक्षण..!
गत २९ एप्रिल २०२६ रोजी विट्यात जो सोहळा पार पडला, तो डोळ्यांचे पारणे फेडणारा होता. डायमंड पॉलिमर्सच्या नव्या वास्तूचे उद्घाटन म्हणजे बेंडखळे यांच्या १५ वर्षांच्या तपश्चर्येला मिळालेली पावती होती. प्रादेशिक अधिकारी राहुल भिंगारे, सुभाष आरगे, अमित शहा आणि पत्रकारितेतील खणखणीत नाणे अशोक मासाळ यांच्या उपस्थितीत हा सोहळा म्हणजे चैतन्याचा उत्सवच ठरला.
अशोक मासाळ यांच्या शब्दांत सांगायचे तर, २०११ ते २०२६ हा प्रवास म्हणजे एका छोट्याशा रोपट्याचा झालेला वटवृक्ष आहे. बेंडखळे हे केवळ ‘धनी’ नाहीत, तर ते खऱ्या अर्थाने ‘मानवतेचे कारखानदार’ आहेत. कामगारांना आपले कुटुंब मानणारा असा उद्योजक आजच्या कलियुगात विरळाच!
विजयाचा शंखनाद..!
विटा एमआयडीसीचे अध्यक्ष आणि महाराष्ट्र चेंबर ऑफ कॉमर्सचे गव्हर्नर कौन्सिल सदस्य म्हणून त्यांची झालेली निवड, हा त्यांच्या संघर्षाला महाराष्ट्राने दिलेला मानाचा मुजरा आहे. रवींद्र बेंडखळे यांची ही गाथा आजच्या प्रत्येक तरुणाला गर्जून सांगत आहे— “अरे तरुणा, संकटांना घाबरू नकोस, ऊठ, कंबर कस आणि स्वतःचा इतिहास स्वतःच्या रक्ताने लिहायला शिक!”
विट्याच्या मातीतून उठलेला हा विजयाचा जयजयकार आता अवघ्या महाराष्ट्राला प्रेरणा देत राहणार, हेच आजचे जळजळीत सत्य आहे!
