“अंगठा उमटत नाही? मग व्हॅसलीन लावा! – पण मतदानाच्या चोरीला कोणतं ‘लोशन’ लावणार, सरकार?”
नमस्कार, मी मेहबूब सर्जेखान ज्येष्ट पत्रकार !”
आज देशातल्या राजकारण्यांची अवस्था पाहून मला ‘ब्रह्मचारी’ सिनेमातल्या त्या गाण्याची आठवण येतेय- “अगा विठ्ठला, तुझे काय नवल सांगू?” पण इथे विठ्ठल नाही, इथे आपला सामान्य माणूस विठ्ठलासारखा उभा आहे आणि सरकार त्याचे अंगठे कापायला बसलंय की काय, अशी शंका येतेय!
राघव चड्ढा नावाच्या एका तरुण पोराने आरसा दाखवला की आमचे नेते कश्या उड्या मारायला लागलेत बघा. अहो, मुद्दा काय तर म्हणे- “अंगठा!” ### अंगठा आहे की ‘अलाउद्दीनचा दिवा’?
आमच्या देशात गरिबांच्या नशिबाला हे सरकार ‘अंगठा’ लावूनच बसलंय. बिचाऱ्या फाटक्या अंगाच्या म्हातारीला ५ किलो सडकं रेशन हवं असेल, तर ती त्या मशीनवर अंगठा घासून घासून स्वतःची कातडी सोलून घेते. आणि तिथे उभा असलेला तो स्वस्त धान्य दुकानाचा ‘महाराज’ काय म्हणतो माहितीये? “म्हातारे, अंगठा उमटत नाहीये… जा, व्हॅसलीन लावून ये!”
अहो, काय ही थट्टा? रक्ताचं पाणी करून शेतात राबणाऱ्या शेतकऱ्याचे हात रापलेले असतात, त्याच्या हातावरच्या रेषा पुसल्या गेलेल्या असतात. त्या माऊलीच्या आणि बापाच्या कष्टाच्या हाताला व्हॅसलीन फासायला सांगताना या सरकारला लाज कशी वाटत नाही? युरियाच्या पोत्यासाठी व्हॅसलीन, पेन्शनसाठी व्हॅसलीन… म्हणजे गरीबाने आपला सन्मानही आता व्हॅसलीन लावून सरकारच्या पायावर अर्पण करायचा की काय?
मतदानाला ‘व्हॅसलीन’ का लागत नाही..?
गम्मत बघा, जिथे या देशाचं भवितव्य ठरतं, जिथे लोकशाहीचा ‘होम’ होतो, त्या मतदानाच्या पेटीपाशी गेल्यावर मात्र या सरकारचं तंत्रज्ञान कुठे पळून जातं? तिथे कुणी म्हणत नाही की, “अंगठा टेकवा, नाहीतर व्हॅसलीन लावून या!” का? कारण तिथे जर अंगठा सक्तीचा केला, तर अनेक ‘बड्या’ नेत्यांच्या मतपेटीतून निघणारी ‘बनावट भुतं’ चारीमुंड्या चीत होतील.
ज्यांचे नाव या जगात नाही, त्यांचे अंगठे कुठून आणणार?
मेलेल्या माणसाला व्हॅसलीन लावून पुन्हा मतदानाला कसं उठवणार?
एकाच माणसाचे दहा-दहा अंगठे असू शकतात का? (रावण असता तर कदाचित जमलं असतं!)
लोकशाहीचा ‘एकलव्य’ आणि आधुनिक ‘द्रोणाचार्य’!
पूर्वी द्रोणाचार्यांनी एकलव्याचा अंगठा मागितला होता कारण त्यांना अर्जुनाला मोठं करायचं होतं. आजचे हे ‘राजकीय द्रोणाचार्य’ गरिबांचे अंगठे रेशन आणि युरियासाठी मागतायत, पण मतदानावेळी मात्र त्यांना तो अंगठा नकोय. तिथे त्यांना फक्त ‘निरक्षर’ मेंढरं हवी आहेत!
जर एखादा माणूस ५ किलो तांदळासाठी व्हॅसलीन लावून आपली ओळख पटवू शकतो, तर तो देशाचा पंतप्रधान किंवा मुख्यमंत्री निवडताना आपली ओळख का पटवू शकत नाही? हा प्रश्न म्हणजे सत्ताधाऱ्यांच्या पोटाला गोळा आणणारा प्रश्न आहे.
आमचा सणसणीत टोला: > “अहो सरकार, गरिबांच्या रेशनवर डल्ला मारणं सोपं जावं म्हणून तिथे अंगठा लावलात, आता जरा हिंमत दाखवा आणि मतदानालाही अंगठा लावा! मग बघू तुमची मतं कशी आणि कुठून वाढतात ते! ज्या दिवशी मतदानाला अंगठा लागेल, त्या दिवशी लोकशाही खऱ्या अर्थाने ‘अंगठ्याने’ तुमची मस्ती उतरवल्याशिवाय राहणार नाही! आणि हो, मतदान केंद्रावरही ‘व्हॅसलीन’चे डबे ठेवाच की, म्हणजे तुमचं खोटं बोलणं जनतेला जरा ‘गुळगुळीत’ वाटेल!”
