विशेष अग्रलेख : सवलतीचे ‘गाजर’, महागाईचा ‘भाऊ’ आणि सरकारचा ‘जीएसटी’चा बाजार !
काय हो सरकार, हे तुमचे कसले अर्थकारण आणि कसले हे अजब तर्कशास्त्र? गणिताच्या पुस्तकात ‘दोन उणे दोन’ शून्य होतात, पण तुमच्या ‘जीएसटी’च्या दरबारात टॅक्स कमी झाला की वस्तूंचे भाव दुप्पट कसे होतात? हा कसला किमयागार बसवलाय तुम्ही अर्थमंत्रालयात? आमचे तरुण खासदार राघव चड्ढा यांनी संसडेत सरकारला आरसा दाखवलाय, आणि त्या आरशात सरकारचा चेहरा मात्र चांगलाच विद्रूप दिसतोय!
कागदावरची सवलत, खिशाला कात्री !
चड्ढा विचारतायत, “जर तुम्ही टॅक्स कमी केला, तर तो गेला कुठे?” हा प्रश्न विचारताना त्यांनी जनतेच्या जखमेवरच बोट ठेवलंय. सरकार ढोल पिटतय की आम्ही जीएसटी कमी केला. पण साहेब, वीजबिल कमी झालंय का? पेट्रोल-डिझेलचे भाव काय फक्त आकाशालाच गवसणी घालणार का? मोबाईल रिचार्जचे भाव तर असे वाढलेत की आता माणसाला माणसाशी बोलायच्या आधी स्वतःच्या सातबाराचा उतारा तपासावा लागतोय!
“ज्या देशात पोरांच्या हातातल्या लेखणीवर आणि वहीवर टॅक्सची टांगती तलवार असते, त्या देशात ‘स्वस्तई’चे ढोल वाजवणे म्हणजे निव्वळ निर्लज्जपणा आहे!”
हा तर ‘पॉकेटमारी’चा सरकारी प्रकार !
अहो, सवलतीचे ‘गाजर’ दाखवून जनतेची पाठ थोपटायची आणि मागच्या दाराने महागाईचा ‘भाऊ’ घरात घुसवून लोकांची लूट करायची, हा तर शुद्ध ‘पॉकेटमारी’चा प्रकार झाला! चड्ढांनी विचारलेला प्रश्न साधा आहे – जर कर कमी झाला, तर त्याचा फायदा मध्यमवर्गीयांच्या ताटात का पडत नाही? की हा सगळा पैसा मधल्यामध्येच ‘मुरतो’ आहे?
बळी कुणाचा?
कॉपी-किताबं महागली, शाई महागली, अगदी जगणंही महागलं! सरकार मात्र ‘आकडेवारीच्या’ वांझोट्या गप्पा मारण्यात मश्गूल आहे. चड्ढांच्या प्रश्नाने आज सत्ताधाऱ्यांची बोलती बंद झाली आहे, कारण त्यांच्याकडे उत्तर नाही, फक्त ‘इव्हेंट’ आहेत. टॅक्समध्ये बदल केल्याचा फायदा जर सामान्यांना मिळत नसेल, तर तो नक्की कुणाच्या ‘तिजोरीत’ जातोय, हे स्पष्ट करण्याची हिंमत आता सरकारने दाखवावी!
आम्ही सांगतो, जनतेचा अंत पाहू नका. हा जीएसटीचा बाजार आता बंद करा आणि खऱ्या अर्थाने सामान्यांच्या खिशात दोन पैसे उरतील असं काहीतरी करून दाखवा. नाहीतर जनता तुम्हाला असा ‘जीएसटी’ लावेल की पुन्हा सत्तेचा हिशोब मांडायला तुम्ही उरणार नाही !
