पुण्यावर वरुणराजाचा ‘सर्जिकल स्ट्राईक’; मोबाईलची ‘धडधड’ थांबली अन पुणेकर ‘मुके’ झाले!
पुण्याच्या अंगावर पाऊस काय कोसळला , जणू आभाळच फाटलं! आज दुपारनंतर वरुणराजाने असा काही ‘राडा’ घातला की, विद्येच्या माहेरघराची अक्षरशः दाणादाण उडाली. अवकाळीचा हा तडाखा इतका जबरदस्त होता की, माणसांच्या तोंडचं पाणी तर पळालच, पण खिशातल्या मोबाईलचा ‘जीव’ सुद्धा टांगणीला लागला. काय ही पुण्याची अवस्था? आणि काय हे पावसाचं अक्राळविक्राळ रूप!
नेटवर्कचा ‘राम नाम सत्य’ आणि कंपन्यांचे पितळ उघडे !
दुपारची विश्रांती घेऊन पुणेकर ताजेतवाने होत असतानाच पावसाने तुफान बॅटिंग सुरू केली. पाठोपाठ एअरटेल आणि व्होडाफोनच्या टॉवर्सनी सपशेल लोटांगण घातलं. मोबाईलचे सर्व्हर काय डाऊन झाले, जणू पुणेकरांची वाचाच बसली! कोणाला ‘हॅलो’ ऐकू येईना आणि कोणाचा ‘मेसेज’ जाईना. आजच्या काळात मोबाईल बंद पडणे म्हणजे माणसाचा श्वास थांबण्यासारखं आहे. ‘डिजिटल इंडिया’च्या फोल गप्पा मारणाऱ्या कंपन्यांचे पितळ आज एका पावसात उघडं पडलं. काय ही तुमची थर्ड क्लास सेवा? आणि काय हे तुमचे कमकुवत नेटवर्क? पावसाचा एक थेंब पडला की तुमच्या सिग्नलची ‘दांडी’ गुल होते? यालाच का तुम्ही आधुनिक तंत्रज्ञान म्हणता?
पाणीच पाणी… सगळीकडे ‘पुणेरी’ कल्लोळ !
रस्त्यांची अवस्था तर विचारूच नका. कर्वे रोड असो वा फर्ग्युसन, सगळीकडे नद्या वाहू लागल्या आहेत. रस्त्यावर गुडघाभर पाणी साचलंय, गाड्यांच्या रांगा लागल्यात आणि ट्रॅफिकचा असा काही खोळंबा झालाय की ‘पुणे तिथे काय उणे’ म्हणणाऱ्यांना आता ‘पुणे तिथे पाणीच पाणी’ म्हणण्याची वेळ आली आहे. त्यात भर म्हणून वीज महामंडळाने आपली ‘पारंपारिक’ लाडकी पद्धत पाळत विजपुरवठा खंडित केला आहे. अंधारात चाचपडणाऱ्या पुणेकरांना आता मोबाईलचा टॉर्च तरी लावावा म्हटलं, तर चार्जिंगची बोंब आणि नेटवर्कचा पत्ता नाही!
“अहो, हा पाऊस आहे की पुणेकरांच्या संयमाची परीक्षा? आभाळातून पाणी पडतंय की संकटं कोसळतायत, हेच कळेनासं झालंय! ही कसली स्मार्ट सिटी आणि हे कसले आमचे भाग्यविधाते?”
प्रशासनाचा गलथानपणा आणि हतबल पुणेकर
दरवर्षी पाऊस येतो, दरवर्षी पाणी साचतं आणि दरवर्षी हे मोबाईलचे टॉवर कोसळतात. मग महापालिका आणि या खाजगी कंपन्या वर्षभर काय ‘गप्पा’ मारत बसतात? पुण्याच्या पायाभूत सुविधांची अवस्था म्हणजे ‘वरतून कीर्तन, आतून तमाशा’ अशी झाली आहे. केवळ कर वसूल करायला प्रशासन टपलेलं असतं, पण आपत्तीच्या वेळी सामान्य पुणेकराला वाऱ्यावर सोडलं जातं.
पुढं काय? जनजीवन विस्कळीत !
हा अवकाळी पावसाचा दणका म्हणजे केवळ सुरुवात आहे. जर हे असंच चालू राहिलं, तर पुण्यातलं जनजीवन पूर्णपणे कोलमडून पडल्याशिवाय राहणार नाही. शिक्षण, व्यापार आणि दळणवळण या सगळ्याच गोष्टी ठप्प झाल्या आहेत. प्रशासनाने आणि टेलिकॉम कंपन्यांनी आता तरी आपल्या या बेजबाबदार वृत्तीतून बाहेर पडावं आणि या तांत्रिक बिघाडाचा तात्काळ बंदोबस्त करावा. अन्यथा, पुणेकर जेव्हा आपल्या खास शैलीत ‘प्रसाद’ द्यायला सुरुवात करतील, तेव्हा पळता भुई थोडी होईल, हे लक्षात ठेवावं!
