तंबाखूच्या चुन्याला महागाईची फोडणी; मद्यपींच्या पेल्यात अर्थमंत्र्यांचे ‘पानी’ !
“काय ही दुनिया आणि काय हे बजेट!” ज्यांच्या सकाळची सुरुवात तंबाखूच्या मळणीने होते आणि संध्याकाळ मद्याच्या पेल्यात विरघळते, त्यांच्या आयुष्यात आज अर्थमंत्र्यांनी मिठाचा खडा टाकला आहे. अहो, सिगारेट आणि तंबाखूवर ४० टक्के जीएसटी आणि वरून एक्साइज ड्युटीचा असा काही ‘हंटर’ फिरवलाय की, आता धूर सोडतानाही फुफ्फुसापेक्षा खिशालाच जास्त ठसका लागणार आहे!
मद्यप्रेमींची तर अवस्था ‘दोन घोटं जास्त घेतले की खिसा रिकामा’ अशी झाली आहे. टीसीएस (TCS) दर १ टक्क्यावरून २ टक्क्यांवर नेऊन सरकारने मद्यपींच्या पेल्यात जणू कडू कारल्याचा रसच ओतला आहे.
कॅन्सरला चपराक, आरोग्याला आधार..!
पण, या साऱ्या गोंधळात सरकारने एक ‘पुण्याचे’ काम केले आहे. ज्यांना कॅन्सर आणि डायबिटीसने विळखा घातलाय, त्यांच्यासाठी औषधांच्या किमती कमी करून सरकारने मरणपंथाला लागलेल्या रुग्णांना नवजीवन दिले आहे. मृत्यू महाग केला आणि जगणं स्वस्त केलं, असा हा काहीसा प्रकार आहे!
॥ तळीरामांची ‘कोरडी’ ओरड! ॥
“काय म्हणावे या सरकारला? आम्हाला वाटलं होतं बजेटमध्ये थोडी ‘सवलत’ मिळेल, पण इथे तर साक्षात ‘साडेसाती’च बसली! ४० टक्के जीएसटी आणि एक्साइज ड्युटीचा असा काही ‘पेग’ भरलाय की, आता बाटलीकडे बघतानाही डोळ्यांत पाणी येतंय. टीसीएस (TCS) वाढवून सरकारने आमच्या खिशातलं उरलं-सुरलं ‘स्पिरिट’ही काढून घेतलंय.
आता परिस्थिती अशी झालीय की, ‘नशा’ करायची असेल तर ती फक्त महागाईचीच उरली आहे. अर्थमंत्र्यांनी औषधं स्वस्त केली हे चांगलं झालं, कारण आता दारूची दरवाढ ऐकून कित्येकांना ‘ब्लड प्रेशर’ची औषधंच जास्त लागणार आहेत! जगात सगळं स्वस्त होईल, पण तळीरामांच्या नशिबी मात्र फक्त ‘महागडा चटका’ आणि ‘कोरडा घसा’च उरलाय. आता काय, ‘ओले’ राहण्यापेक्षा ‘कोरडे’ राहण्यातच शहाणपण आहे!”
हातात मोबाईल अन मैदानात जोम..!
तरुणाईसाठीही गाजर नाही तर प्रत्यक्ष ‘मिठाई’च वाटली आहे. स्मार्टफोन आणि टॅबलेट आता सामान्यांच्या आवाक्यात येतील. एवढेच नाही, तर बॅट-बॉल आणि खेळाचे साहित्य स्वस्त करून सरकारने पोरांना खुणावले आहे— “अरे वेड्यांनो, व्यसनाच्या आहारी जाऊन शरीरं खराब करण्यापेक्षा मैदानात उतरा आणि घाम गाळा!”
थोडक्यात सांगायचे तर, सरकारने तंबाखूच्या धुराला फाटा देऊन आरोग्याचा प्रकाश पसरवण्याचा प्रयत्न केला आहे. आता जनता जनार्दन काय निर्णय घेतेय, हे पाहायचे!
