‘पँथर’ची डरकाळी! दलितांच्या हक्काच्या पैशावर डल्ला माराल, तर आझाद मैदान गाठू.!
संतोष आठवले यांचा सरकारला ‘सडकून’ इशारा ; ‘पँथर आर्मी’च्या तिसऱ्या वर्धापन दिनी ‘नवे दानवाड’मध्ये क्रांतीचे रणशिंग!
नवे दानवाड: अहो, हे सरकार आहे की कुणाचे सावकार? दलितांच्या रक्ताघामाचा पैसा, त्यांच्या कल्याणाचा निधी जिथे वापरायला हवा, तिथे न वापरता दुसरीकडेच उधळला जातोय? हा अन्याय आता ‘पँथर’ सहन करणार नाही! “आमच्या हक्काचा निधी इतरत्र वळवणे थांबवा, नाहीतर मुंबईचे आझाद मैदान तुमच्या आंदोलनाने गाजवून टाकू,” अशी भीमगर्जना ‘पँथर आर्मी’चे संस्थापक संतोष आठवले यांनी केली आहे.
नवे दानवाडच्या मातीत त्यागमूर्ती रमाईंची जयंती आणि पँथर आर्मीचा तिसरा वर्धापन दिन एखाद्या उत्सवासारखा नाही, तर एखाद्या क्रांतीसारखा साजरा झाला! सत्तेच्या उबेत बसलेल्यांना दलितांच्या प्रश्नांचा विसर पडला असेल, तर त्यांना जागे करण्यासाठी संतोष आठवले यांनी आपल्या भाषणातून सरकारचे अक्षरश: वाभाडे काढले.
ठराव नाहीत, हे तर ‘हुंकार’ आहेत.!
या मेळाव्यात केवळ भाषणं झाली नाहीत, तर सात असे ठराव मंजूर झाले ज्यांनी सरकारच्या तख्ताला तडे जातील. पँथर आर्मीने मांडलेले हे मुद्दे म्हणजे उपेक्षितांच्या जगण्याचा जाहीरनामाच आहे:
निधीला कायद्याचे कवच द्या: SC/ST समाजाचा पैसा इतर योजनांकडे वळवण्याचे पाप थांबवा. ‘विशेष आर्थिक अधिकार कायदा’ करा आणि अखर्चित निधी पुढच्या वर्षी वापरा, बुडवू नका!
लाडकी बहीण की लाडकी क्रूरता.?: अहो सरकार, जर ‘लाडकी बहीण’ योजनेचा निधी आमच्या बजेटमधून घेणार असाल, तर आमच्या भगिनींना १५०० रुपये देऊन बोळवण करू नका; त्यांना १५,००० रुपये सन्मान निधी द्या!
निराधारांना आधार द्या: संजय गांधी निराधार योजनेचे मानधन ६,००० रुपये करा. म्हातारपणी कष्टकऱ्यांच्या हाती ५,००० रुपयांची पेन्शन पडलीच पाहिजे.
घरकुल की महाल.?: रमाई घरकुल योजनेचे अनुदान १० लाख रुपये करा. झोपडीत राहणाऱ्यालाही सन्मानाने जगू द्या!
विचारांची ‘तोफ’ आणि भीमगीतांचा ‘जल्लोष.’!
कार्यक्रमाला ‘दैनिक दवंडी’चे मुख्य संपादक विश्वास कांबळे, ज्येष्ठ नेते कॉम्रेड शंकर पुजारी, बी. आर. कांबळे आणि सेनापती भोसले यांसारख्या दिग्गज विचारांच्या तोफा धडाडल्या. ‘दैनिक दवंडी’च्या विशेष अंकाचे प्रकाशन होताच उपस्थितांनी ‘जय भीम’च्या घोषणांनी परिसर दणाणून सोडला.
केवळ घोषणाबाजी नाही, तर सामाजिक कृतज्ञता म्हणून अंगणवाडी सेविका, आशा वर्कर्स आणि ग्रामपंचायत कर्मचाऱ्यांचा सत्कार करण्यात आला. आणि संध्याकाळी? संध्याकाळी तर सुरेश सातारकर यांच्या भीमगीतांनी उपस्थितांच्या नसानसात क्रांतीचे स्फुल्लिंग चेतवले!
‘पँथर’ सज्ज आहे.!
जिल्हाध्यक्ष मच्छिंद्र कांबळे यांनी संघटनेच्या तीन वर्षांच्या संघर्षाचा पाढाच वाचला. यावेळी मुत्ताप्पा कांबळे, श्रावण कांबळे, छायाताई सातारकर आणि राजू मोमीन यांच्यासह हजारो पँथर्सनी एकच शपथ घेतली— आता माघार नाही, आता फक्त प्रहार!
सरकारने हा इशारा गांभीर्याने घ्यावा, अन्यथा आझाद मैदानावर उसळणारा हा ‘निळा समुद्र’ तुम्हाला महागात पडल्याशिवाय राहणार नाही, हे मात्र नक्की!
