नवे दानवाडच्या मातीत पँथर आर्मी फुंकणार संघर्षाचे रणशिंग!

संतोष आठवले यांच्या तोफेतून सुटणार ‘निधी चोरी’च्या अन्यायाविरुद्ध धगधगते गोळे; ८ फेब्रुवारीला पँथर आर्मीचा भव्य स्वाभिमान सोहळा!

“भीमरायाचा वाघ आता शांत बसणार नाही!” असा निर्वाणीचा इशारा देत, केंद्रीय अर्थसंकल्पातील अन्यायाच्या चिंध्या करण्यासाठी पँथर आर्मी स्वराज्य क्रांती सेना सज्ज झाली आहे. निमित्त आहे संघटनेचा ३ रा वर्धापन दिन आणि त्यागमुर्ती महामाता रमाई भीमराव आंबेडकर यांची जयंती! येत्या रविवारी, ८ फेब्रुवारी रोजी नवे दानवाड येथील ‘पँथर आर्मी भवन’ येथे हा विचारांचा रणसंग्राम रंगणार आहे.

अर्थसंकल्पाचा ‘काळा’ हिशोब..!

अहो, हे सरकार म्हणजे ‘वर डामडौल आणि आत आनंदीआनंद’ अशातला प्रकार झाला आहे. यंदाच्या केंद्रीय अर्थसंकल्पात अनुसूचित जातींच्या पदरी पुन्हा एकदा उपेक्षाच पडली आहे. लोकसंख्येच्या प्रमाणात किमान २ लाख ३० हजार कोटी रुपयांची तरतूद अपेक्षित असताना, सरकारने केवळ १ लाख ६८ हजार कोटींवर बोळवण केली आहे. हा उरलेला ६१ हजार कोटींचा आकडा कुठे गेला? ही साधी कपात नसून, दलितांच्या हक्काची केलेली ‘निधी चोरी’ आहे! या अन्यायाचा पाढा वाचण्यासाठी आणि सत्ताधाऱ्यांच्या नाकावर टिच्चून आंदोलनाची नवी दिशा ठरवण्यासाठी पँथर आर्मीचे संस्थापक प्रमुख संतोष एस. आठवले यांची तोफ या सोहळ्यात धडाडणार आहे.

कार्यक्रमाची रूपरेषा : विचारांचे लेणे आणि क्रांतीची गाणी सकाळी १० वाजता महामाता रमाई आणि बाबासाहेबांच्या प्रतिमेला अभिवादन करून या ‘स्वाभिमान सोहळ्या’ची मुहूर्तमेढ रोवली जाईल. ‘महामाता रमाईंचा त्याग’ या विषयावर तज्ज्ञ वक्त्यांचे बौद्धिक अमृत प्यायला मिळणार आहे. गेल्या तीन वर्षांत रक्ताचे पाणी करून संघटना उभी करणाऱ्या निष्ठावंतांचा गौरवही यावेळी केला जाणार आहे. केवळ भाषणेच नव्हे, तर ‘जयभीम गायन पार्टी, हुपरी’ यांच्या बुलंद आवाजातील क्रांतीगीतांनी नवे दानवाडचा परिसर दुमदुमून जाईल.

भीमपुत्रांनो, आता वेळ आली आहे..!

या सोहळ्याला मच्छिंद्र रुईकर, प्रशांत माने, संजय कांबळे, नितेश कुमार दिक्षांत यांसारख्या झंझावाती कार्यकर्त्यांची मांदियाळी जमणार आहे. भिकू कांबळे आणि त्यांच्या सहकाऱ्यांनी या कार्यक्रमासाठी रान उठवले आहे.

ज्यांच्या रक्तात अन्याय सोसण्याची सवय नाही आणि ज्यांच्या उरात भीमरायाचा स्वाभिमान धगधगतो आहे, त्या प्रत्येक आंबेडकरी अनुयायाने या सोहळ्याला उपस्थित राहणे हे केवळ कर्तव्य नसून ती काळाची गरज आहे. चला, या ८ तारखेला नव्या संघर्षाची गाथा लिहिण्यासाठी नवे दानवाडला एकत्र येऊया!

सोहळ्याचे वेळापत्रक: