अहो, हे कसले रक्षक? ही तर वर्दीतली दरोडेखोरी ! गुन्हे शाखेचा पोलीसच निघाला ‘ड्रग्ज माफिया’; खाकीची अब्रू वेशीवर टांगली !
पुणे | ज्या खाकी वर्दीसमोर गुन्हेगारांनी थरथर कापायला हवे, ज्या खाकीने सामान्यांच्या डोळ्यांतील अश्रू पुसायला हवेत, त्याच खाकीने आज माणुसकीला काळिमा फासला आहे! नगर जिल्हा पोलीस दलाच्या स्थानिक गुन्हे शाखेतील शामसुंदर विश्वनाथ गुजर (बक्कल नं. २२०५) याने पोलिसांची टोपी ड्रग्जच्या चिखलात फेकून दिली आहे. हा रक्षक नाही, तर समाजाच्या मुळावर उठलेला भक्षक आहे, हे आता सिद्ध झाले आहे. पुणे ग्रामीण पोलिसांनी पहाटेच्या साडेचार वाजता या ‘वर्दीतल्या माफिया’च्या मुसक्या आवळून संपूर्ण पोलीस दलालाच मोठा झटका दिला आहे.
पापाचा घडा भरला !
या प्रकरणाचा पदर १७ जानेवारीला उलगडला. शिरूरच्या एका गॅरेज चालकाला, शादाब शेखला पोलिसांनी जेव्हा १ किलो अंमली पदार्थांसह पकडले, तेव्हा कोणालाही स्वप्नात वाटले नव्हते की या पापाची मुळं थेट नगरच्या पोलीस दलात रुजलेली असतील. पोलिसांनी शादाबला पोलिसी खाक्या दाखवताच त्याने पोपटासारखे नाव ओकले – शामसुंदर गुजर! आपल्याच खात्यातील एक माणूस तरुणांच्या नसांमध्ये ड्रग्जचे विष टोचण्याचे काम करतोय, हे समजताच तपासाची चक्रे वेगाने फिरली.
खाकीआड लपलेला ‘काळा बाजार’
अहिल्यानगर पोलीस दलातील हा गुजर नावाचा इसम स्वतः अमली पदार्थ विकत होता, हे ऐकूनच संतापाचा कडाका उडतो. पारनेर तालुक्यातील ज्ञानदेव ऊर्फ माऊली शिंदे, ऋषिकेश चित्तर आणि महेश गायकवाड यांसारख्या गुंडांशी या पोलिसाचे साटेलोटे होते. ही केवळ साखळी नाही, तर ही पोलीस दलाला लागलेली वाळवी आहे.
“ज्या हातांनी गुन्हेगारांना बेड्या ठोकल्या पाहिजेत, त्या हातांनी अमली पदार्थांची पाकिटे विकली जावीत? ही कसली शिस्त आणि हा कसला खाकीचा दरारा? शामसुंदर गुजरने केवळ गुन्हा केलेला नाही, तर त्याने महाराष्ट्राच्या गौरवशाली पोलीस परंपरेचा विश्वासघात केला आहे. अशा ‘वर्दीतल्या डाकू’ला चौकात उभं करून जाब विचारला पाहिजे!”
आता साहेबांची वारी..?
पुणे ग्रामीणचे पोलीस अधीक्षक संदीपसिंग गिल यांनी या प्रकरणाचा धडाका लावला असला, तरी प्रश्न उरतोच – या गुजरला अभय देणारा नगर पोलीस दलातला एखादा ‘मोठा मासा’ अद्याप पाण्यातच पोहतोय का? या प्रकरणाचा तपास आता थेट पोलीस दलाच्या अंतर्गत स्वच्छतेचा विषय बनला आहे.
