वसंत मोरेंचा ‘न्यायालयीन’ गनिमी कावा ; व्यंकोजी खोपडेंचे नगरसेवकपद आता ‘रामभरोसे’!
पुण्याच्या राजकीय आखाड्यात सध्या निवडणुकीच्या गुलालपेक्षा कोर्टाच्या कागदांचा धुरळा अधिक उडू लागला आहे. प्रभाग ३८ (ई) मधून मोठ्या दिमाखात निवडून आलेले भाजपचे नगरसेवक व्यंकोजी खोपडे यांच्या गळ्यात पडलेली विजयाची माळ आता ‘कायद्याचा फास’ बनू लागली आहे. “तुमचं आमचं जमेना आणि काहीच हलेना” अशी अवस्था झालेल्या खोपडेंच्या विरोधात माजी नगरसेवक वसंतराव मोरे यांनी असा काही ‘न्यायालयीन गनिमी कावा’ केला आहे की, भाजपच्या तंबूत आता फक्त काळजाची धडधड ऐकू येत आहे!
बांधकाम ‘अनधिकृत’ अन् पायंडाही ‘अशुद्ध’..!
वसंत मोरेंनी पुराव्यांचा असा काही डोंगर उभा केला आहे की, व्यंकोजींना आता तिथे लपायलाही जागा उरलेली नाही. “स्वतःची इमले अनधिकृतपणे चढवायचे आणि महापालिकेत जाऊन शहराच्या शिस्तीच्या बाता मारायच्या, हा ढोंगीपणा आता पुणेकर सहन करणार नाहीत,” अशा शब्दांत मोरेंनी खोपडेंचा पंचनामा केला आहे. नियमांचे उल्लंघन करून जर घर उभं राहिलं असेल, तर त्या घरात राहण्याचा अधिकार उरतो, पण पालिकेच्या सभागृहात बसण्याचा अधिकार मात्र नियमाने संपुष्टात येतो!
नोकर भरतीचा ‘भ्रष्ट’ पसारा..!
केवळ सिमेंट-वाळूचाच हा खेळ नाही, तर यात सत्तेचा माजही दडलेला आहे, असा दावा मोरेंनी केला आहे. महापालिकेत समाविष्ट झालेल्या गावांच्या नोकर भरतीत खोपडेंनी म्हणे मोठा ‘हातखंडा’ दाखवला. विभागीय आयुक्तांनी केलेल्या चौकशीत खोपडे साहेब ‘दोषी’ ठरले असल्याचा बॉम्बच मोरेंनी पत्रकार परिषदेत फोडला आहे. म्हणजेच, इकडे ‘घर’ गेलं आणि तिकडे ‘आब्रू’ही गेली, अशी गत व्यंकोजींची झाली आहे.
आता न्यायालयच ‘तारणार’ की ‘मारणार’?
वसंत मोरे यांनी थेट न्यायालयाचे दार ठोठावून खोपडेंची झोप उडवली आहे. निवडणुकीत जरी मतदारांनी कौल दिला असला, तरी कायद्याच्या कसोटीवर खोपडे उतरणार का? हा खरा प्रश्न आहे. थोडक्यात सांगायचे तर, व्यंकोजी खोपडेंचे नगरसेवकपद आता पूर्णपणे ‘रामभरोसे’ झाले असून, वसंत मोरेंनी मात्र आपला ‘बाण’ लक्ष्यावर बरोबर मारला आहे!
