पेट्रोल-डिझेल गगनाला, खिसा चालला तळाला ! नोकरदारांचा पगार वाढेना, आणि सामान्य माणसाला काही सुचेना..!
लेखक: प्रेस मीडिया लाईव्ह:
सध्याच्या घडीला सर्वसामान्य नागरिकांच्या जगण्यातील सर्वात मोठा यक्षप्रश्न कोणता असेल, तर तो म्हणजे दिवसेंदिवस वाढणारी महागाई आणि स्थिर असलेले उत्पन्न! इंधनाचे दर आणि जीवनावश्यक वस्तूंच्या किमती ज्या वेगाने वाढत आहेत, त्या तुलनेत सामान्य माणसाच्या खिशाची ताकद मात्र कमी पडू लागली आहे.
पेट्रोल आणि डिझेलचे दर गगनाला भिडले की, त्याचा थेट परिणाम वाहतूक खर्चावर होतो आणि तिथूनच महागाईचे एक दुष्टचक्र सुरू होते. इंधनाचे दर वाढले की बाजारपेठेतील भाजीपाल्यापासून ते थेट किराणा साहित्यापर्यंत सर्वच गोष्टी कशा अगदी रांगेत उभे राहून महाग होतात, हा अर्थशास्त्राचा अजब नियम सध्या सर्वसामान्यांच्या पाचवीलाच पुजला गेला आहे.
सर्वसामान्यांचा, कामगारांचा आणि मध्यमवर्गीयांचा हक्काचा आहार म्हणजे वडापाव, मिसळपाव, समोसा आणि कचोरी! पण आज परिस्थिती अशी झाली आहे की, या नेहमीच्या खाद्यपदार्थांचे दरही सामान्यांच्या बजेटबाहेर जाऊ लागले आहेत. बाजारातील भाजीपाल्याची स्थिती तर आणखीनच बिकट आहे. गृहिणींचे स्वयंपाकघराचे बजेट पूर्णपणे कोलमडले आहे. खाद्यतेलाचे डबे असोत, भाजीपाला असो की उन्हाळ्याच्या दिवसांत दिलासा देणारी थंड पेये असोत; प्रत्येक वस्तू खरेदी करताना आता सामान्यांना दहावेळा विचार करावा लागत आहे.
घरातील घरगुती गॅस सिलेंडरचे दर, पालिकेचा घरटॅक्स आणि मुलांच्या शिक्षणाचा खर्च या त्रिकुटाने पालकांचे कंबरडे मोडले आहे. त्यात भर म्हणून जे कुटुंब भाड्याच्या घरात राहतात, त्यांच्या घरभाड्यात झालेली वाढ ही जखमेवर मीठ चोळणारी ठरत आहे. आजारपणाचा खर्च आणि दवाखान्याची बिले पाहता, सामान्य माणसाने निरोगी राहणे हाच एकमेव पर्याय उरला आहे.
उत्पन्नाचे साधन मर्यादित आणि खर्चाचे मार्ग अमर्याद, अशा कात्रीत आजचा पांढरपेशा आणि कष्टकरी वर्ग अडकला आहे. सध्याच्या परिस्थितीत कुटुंबातील एका व्यक्तीच्या पगारावर संपूर्ण घर चालवणे अशक्य झाले आहे. त्यामुळे कुटुंबातील प्रत्येक सदस्याला घराबाहेर पडून काम करावे लागत आहे. पण खरी अडचण तिथेच आहे; अनेक वर्षांपासून नोकरी करणाऱ्या कर्मचाऱ्यांचे पगार ज्या वेगाने वाढायला हवेत, त्या वेगाने ते वाढत नाहीत. काम वाढते आहे, पण दाम वाढत नाही ही आजच्या नोकरदारांची मुख्य व्यथा बनली आहे.
या सर्व परिस्थितीमध्ये लोकशाहीचा चौथा स्तंभ असलेल्या पत्रकारितेची जबाबदारी अत्यंत मोठी असते. समाजात घडणाऱ्या दैनंदिन घडामोडी आणि बातम्या लोकांपर्यंत पोहोचवणे हे माध्यमांचे मुख्य कर्तव्य आहेच. आज पत्रकारितेमध्ये बातम्यांची प्रचंड जत्रा भरलेली दिसते, बातम्या तर अथांग समुद्रासारख्या मिळतात; परंतु माध्यमांना आर्थिक स्थैर्य देणाऱ्या जाहिराती मात्र एखाद्या नवसानेच मिळतात, ही आजची सर्वात मोठी शोकांतिका आहे. जेव्हा सामान्य जनतेच्या या आर्थिक विवंचनेवर, वाढत्या महागाईवर आणि रोजगाराच्या मुख्य प्रश्नांवर चर्चा होण्याची वेळ येते, तेव्हा मात्र या मूळ विषयांना बाजूला सारून इतर व्यावसायिक किंवा जाहिरातविषयक गोष्टींना अधिक प्राधान्य दिले जाते. जनतेच्या खऱ्या प्रश्नांवर नेमकेपणाने आणि सातत्याने उहापोह होणे आजच्या काळात अत्यंत गरजेचे आहे.
शेवटी प्रश्न उरतो तो एकाच गोष्टीचा—सामान्य माणसाने आता कौटुंबिक गाडा चालवायचा कसा? कर भरणे, वाढलेले भाडे देणे आणि मुलांचे शिक्षण सांभाळणे या सर्व आघाड्यांवर लढताना सामान्य नागरिक मेटाकुटीला आला आहे. या वाढत्या महागाईच्या समस्येवर वेळीच योग्य आणि व्यावहारिक तोडगा निघाला नाही, तर सर्वसामान्यांचे जीवन अधिक खडतर होईल यात शंका नाही.
